فوتو Informburo.kz
الماتىدا تەحنيكالىق تۇرعىدا تولىق اياقتالعان العاشقى كرەماتوري ءالى كۇنگە دەيىن ىسكە قوسىلماعان. 2025 جىلدىڭ قازان ايىندا نىسان جاڭا بالانسۇستاۋشىعا بەرىلگەنىمەن، وبەكت جۇمىسىنا كىرىسپەگەن، دەپ حابارلايدى "ادىرنا".
Tengrinews.kz-كە جاۋاپ بەرگەن قالالىق اكىمدىك قىمبات جوبانىڭ نەگە ءالى ىسكە قوسىلماعانىن ءتۇسىندىردى.
الماتىداعى كرەماتوريدى 2021 جىلى اشۋ جوسپارلانعان ەدى، الايدا اشىلۋ مەرزىمى بىرنەشە رەت كەيىنگە قالدىرىلعان. اكىمدىك وكىلدەرى جوبانى ەكى كەزەڭگە بولگەنىن ايتقان: عيمارات قۇرىلىسىن اياقتاۋ جانە ينجەنەرلىك جەلىلەردى تارتۋ. عيماراتتىڭ قۇرىلىسى 2021 جىلدىڭ جەلتوقسانىندا اياقتالسا، ينجەنەرلىك جەلىلەردى تارتۋ 2022 جىلدىڭ ءۇشىنشى توقسانىنا جوسپارلانعان.
2022 جىلدىڭ قاراشاسىندا نىساننىڭ قۇرىلىسى تاعى كەيىنگە شەگەرىلدى. بۇعان باعانىڭ ءوسۋى مەن جوبالىق-سمەتالىق قۇجاتتامانى قايتا قاراۋ قاجەتتىلىگى سەبەپ بولعان. ول ۋاقىتتا كرەماتوري ينجەنەرلىك جەلىلەردى تارتۋ كەزەڭىندە تۇرعان: جۇمىستىڭ 80 پايىزى ورىندالعان، بىراق ترانسفورماتورلىق قوسالقى ستانسا مەن گاز قۇبىرى ورناتىلماعان ەدى. جاڭارتىلعان بيۋدجەت بەكىتىلگەننەن كەيىن جوبانى «مەمساراپتاماعا» قايتا ەنگىزىپ، وڭ قورىتىندى العان سوڭ جۇمىستاردى جالعاستىرۋ جوسپارلانعان. وسىعان بايلانىستى كرەماتوريدىڭ اشىلۋى «2023 جىلدىڭ ءبىرىنشى توقسانىنا» اۋىستىرىلدى.
2023 جىلدىڭ تامىزىندا سىرتقى ينجەنەرلىك جەلىلەردى تارتۋ جۇمىستارى جوبانى قايتا تۇزەتۋ قاجەتتىلىگىنە بايلانىستى توقتاتىلدى. بۇل وزگەرىستەر ماگيسترالدى گاز قۇبىرى تراسساسىنىڭ اۋىسۋىنا بايلانىستى تۋىنداعان: ونىڭ ۇزىندىعى 185 مەتردەن 1664 مەترگە دەيىن ۇزارعان.
2024 جىلدىڭ ناۋرىزىندا اكىمدىك قالا كرەماتوريىنە ينجەنەرلىك جەلىلەردى تارتۋعا جاۋاپتى مەردىگەردى سوتقا بەرگەنىن حابارلادى. سول كەزدە سىرتقى جەلىلەر بويىنشا جۇمىستاردىڭ 95 پايىزى ورىندالعانى ايتىلعان. كەيىن سوت شەشىمىمەن «تارازقۇرىلىسينۆەست» جشس مەملەكەتتىك ساتىپ الۋلارعا جىبەرىلمەيتىن كومپانيا دەپ تانىلىپ، الماتى قالاسىنىڭ بيۋدجەتىنە ايىپپۇل تولەۋگە مىندەتتەلدى.
2025 جىلدىڭ ساۋىرىندە الماتىدا قازاقستانداعى العاشقى كرەماتوريدىڭ تولىق دايىن ەكەنى حابارلاندى. نىساننىڭ پايدالانۋعا بەرىلۋ اكتىسى دايىن، ال ارحيتەكتۋرا جانە ادىلەت ورگاندارىنداعى تىركەۋ 2024 جىلدىڭ ءۇشىنشى توقسانىندا اياقتالعان. الايدا اشىلۋ مەرزىمى مەن قىزمەت كورسەتۋ باعاسى اكىمدىكتە جاريالانبادى.
اكىمدىكتىڭ مالىمەتىنشە، نىسان تولىق دايىن جانە قاجەتتى جابدىقتارمەن قامتاماسىز ەتىلگەن. بىراق وبەكت ءالى رەسمي تۇردە ىسكە قوسىلعان جوق. التى ايدان استام ۋاقىت بويى بىردە-ءبىر مەملەكەتتىك ورگان كرەماتوريدى بالانسقا قابىلداۋعا كەلىسپەگەن.
تەك جۋىردا بۇل ماسەلە شەشىلگەندەي بولدى. 2025 جىلعى 17 قازانداعى اكىم قاۋلىسىمەن كرەماتوري الماتى قالاسىنىڭ قوعامدىق دەنساۋلىق ساقتاۋ باسقارماسىنا قاراستى قالالىق پاتولوگواناتوميالىق بيۋرونىڭ بالانسىنا بەرىلدى. دەگەنمەن نىسان ءالى جۇمىس ىستەمەيدى.
«مەكەمە نىسانعا قاتىستى قۇقىق بەلگىلەيتىن قۇجاتتاردى مەملەكەتتىك تىركەۋدەن وتكىزۋ جۇمىستارىن جۇرگىزىپ جاتىر. عيمارات پەن جابدىقتاردى قابىلداۋ جانە تىركەۋ كەزەڭى اياقتالدى. كەلەسى كەزەڭ – نىسان ورنالاسقان جەر تەلىمىن بەرۋ تۋرالى اكىمدىك قاۋلىسىنا قاجەتتى قۇجاتتاردى راسىمدەۋ»، – دەپ حابارلادى اكىمدىك.
اكىمدىك وكىلدەرى ايتۋىنشا، كرەماتوريدىڭ جۇمىس ىستەمەي تۇرعان نەگىزگى سەبەبى – قازاقستاندا كرەماتوريلەردىڭ قىزمەتىن رەتتەيتىن زاڭدار مەن ەرەجەلەردىڭ جوقتىعى. نورماتيۆتىك-قۇقىقتىق بازا بولماعاندىقتان، وبەكتىنىڭ ناقتى قاشان اشىلاتىنى بەلگىسىز.
بۇل ەرەجەلەردى رەسپۋبليكالىق دەڭگەيدە – دەنساۋلىق ساقتاۋ، ەكولوگيا جانە ادىلەت مينيسترلىكتەرى ازىرلەۋى ءتيىس.
كرەماتوري بولاشاقتا قالالىق پاتولوگواناتوميالىق بيۋرونىڭ قۇرىلىمدىق بولىمشەسى رەتىندە جۇمىس ىستەيدى.
«كرەماتوريدى قارجىلاندىرۋ جانە شتاتتىق قۇرىلىمدى قالىپتاستىرۋ ماسەلەلەرى قۇقىق بەلگىلەيتىن قۇجاتتاردىڭ تىركەلۋى مەن ءتيىستى نورماتيۆتىك اكتىلەر قابىلدانعاننان كەيىن شەشىلەتىن بولادى»، – دەدى اكىمدىك.
بۇعان دەيىن ءماجىلىس دەپۋتاتى سەرگەي پونوماريوۆ كرەماتوريگە بارىپ، ونىڭ ىشكى دايىندىعىن كورسەتكەن ەدى. ونىڭ ايتۋىنشا، نىسان قۇرىلىسىنا 1,5 ملرد تەڭگە جۇمسالعان.
