قۇرىلىس كودەكسىن تالقىلاۋ جونىندەگى جۇمىس توبىنىڭ وتىرىسىندا كۇتپەگەن جاعداي ورىن الدى. ونلاين قوسىلعان مامانداردىڭ ءبىرى جانىندا تاماق پەن سۋسىندى قويىپ، ەكرانعا ۇيدەگى مايكامەن شىققان. ۆيدەونى ءماجىلىس دەپۋتاتى بولاتبەك اليەۆ جاريالاپ، بۇل جاعداي ءوزىن ىڭعايسىزداندىرماعانىن، كەرىسىنشە قازىرگى تالقىلاۋلاردىڭ اشىقتىعى تۋرالى ويلاندىرعانىن ايتادى، دەپ حابارلايدى "ادىرنا".
دەپۋتاتتىڭ ايتۋىنشا، ناعىز اشىقتىق ءدال وسىلاي كورىنەدى.
"بەيسەنبى كۇنى قۇرىلىس كودەكسى بويىنشا جۇمىس توبىنىڭ وتىرىسىندا ءبىر قىزىق جايتقا كوزىم ءتۇستى. تالقىلاۋعا قوسىلىپ وتىرعان مامانداردىڭ ءبىرى – كادىمگى ءۇي جاعدايىندا، مايكامەن وتىر. قولىندا تاماعى، جانىندا سۋسىنى. سولاي وتىرىپ ءبىزدى تىڭداپ، تالقىلاۋعا قاتىسىپ وتىر. ءبىر ءسات ويلانىپ قالدىم. بۇل – تارتىپسىزدىك ەمەس، قولجەتىمدىلىكتىڭ بەلگىسى”، - دەيدى ول.
دەپۋتات بۇرىن مۇندايعا ەشقاشان كۋا بولماعانىن، سالادا تاجىريبەسى بولسا دا، زاڭ تالقىلاۋىنا ءدال وسىلاي ەركىن قاتىسۋ مۇمكىن بولماعانىن مالىمدەدى.
"ال قازىر ءبىز قانداي فورماتتا جينالساق تا، كاسىبي ورتا وكىلدەرى ءدال سول ۋاقىتتا پىكىرىن قوسا الادى. كىم كەڭسەدە، كىم جولدا، كىم ۇيدە ءبارىبىر. ەڭ باستىسى قاتىسا الادى. بۇل – ءماجىلىستىڭ اشىق، قولجەتىمدى جانە شىن مانىندە دەموكراتيالىق جۇمىس جۇرگىزىپ جاتقاندىعىنىڭ ناقتى دالەلى. ءبىز زاڭدى كابينەتتە ەمەس، سالانىڭ ءوز ماماندارىمەن بىرگە اشىق تالقىلاپ، ايتىسىپ، دالەلدەپ جاساپ وتىرمىز. شىنىمدى ايتسام، نازار اۋدارماي قالا المادىم. ءتىپتى ۆيدەوعا ءتۇسىرىپ الدىم. ويتكەنى بۇل – بۇگىنگى رەفورمالاردىڭ ءمانىن كورسەتەتىن ءسات", - دەپ جازدى بولاتبەك اليەۆ.
ال جەلىدەگىلەردىڭ كەيبىرى وتىرىسقا قاتىسۋشىنى سىناسا، ءبىرى قولدادى.
ءماجىلىس – بيلىكتىڭ ءۇش تارماعىنىڭ ءبىرى، زاڭ شىعارۋ ورگانى.
