بىشكەكتە 20 جاستاعى قىز اتا-اناسىنىڭ حيدجاب كيۋگە ماجبۇرلەۋىنەن تۋىنداعان جۇيەلى تۇرمىستىق زورلىق-زومبىلىق تۋرالى قۇقىق قورعاۋشىلارعا شاعىمداندى. بۇل اقپاراتتى «سەزىم» كريزيستىك ورتالىعى راستادى، دەپ حابارلايدى "ادىرنا".
قىزدىڭ ايتۋىنشا، ونىڭ اتا-اناسى وعان ۇزاق ۋاقىت بويى كۇش كورسەتىپ كەلگەن. ول بوستاندىعىنىڭ شەكتەلگەنىن، ۇيدەن شىعۋىنا جانە وقۋىنا تىيىم سالىنعانىن، تەلەفوننىڭ تارتىپ الىنعانىن جەتكىزدى.
«مەن حيدجاب كيمەيمىن دەپ ايتسام، اتا-انام ماعان جىن كىرىپ كەتكەن دەپ ويلايدى. سوڭعى جىلى ولار ءدىني فاناتيزمگە بەت بۇرىپ كەتتى»، – دەيدى جابىرلەنۋشى.
قىزدىڭ سوزىنشە، ونى شلانگىمەن ۇرعان، سونداي-اق لاس، ءناجىس ارالاس سۇيىقتىققا ءماجبۇرلى تۇردە باتىرعان. مۇنىمەن قوسا، ونى مولداعا بىرنەشە رەت اپارىپ، «جىن شىعارۋ» راسىمدەرىن جاساپ وتىرعان.
قازىرگى ۋاقىتتا جابىرلەنۋشى «سەزىم» داعدارىس ورتالىعىندا پسيحولوگيالىق جانە الەۋمەتتىك كومەك الىپ جاتىر. ورتالىق وكىلدەرى اتا-اناسىمەن دە سويلەسكەن.
جاعداي قوعامنىڭ نازارىن اۋدارعان سوڭ، اتا-اناسى قىزعا حيدجاب كيمەۋگە رۇقسات بەرگەنى حابارلاندى. دەگەنمەن قۇقىق قورعاۋشىلار بۇل ءىستى باقىلاۋدا ۇستاپ وتىر.
بۇل جاعداي قىرعىزستاندا تۇرمىستىق زورلىق-زومبىلىق، ءماجبۇرلى ءدىني تالاپتار جانە راديكال كوزقاراستاردىڭ كۇشەيۋى ماسەلەلەرىن تاعى دا كۇن تارتىبىنە شىعاردى.
قۇقىق قورعاۋشىلار جاستاردىڭ ءدىني قىسىمعا ۇشىراۋى جيىلەپ كەلە جاتقانىن، مۇنداي جاعدايلار كوبىنە وتباسىندا جاسىرىن قالىپ قوياتىنىن اتاپ ءوتتى.
وقيعا بويىنشا تەكسەرۋ جالعاسىپ جاتىر.
