الماتى وبلىسىنىڭ ۇيعىر اۋدانىندا قىتاي تۋى مەن قىتاي كوممۋنيستىك پارتياسىنىڭ توراعاسى سي ءتسزينپيننىڭ سۋرەتىن ورتەگەن 18 ادامنىڭ ۇستىنەن ءىس قوزعالدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
13 قاراشادا رەسمي تىركەلمەگەن «ناعىز اتاجۇرت» قوزعالىسىنىڭ بەلسەندىلەرى قالجات شەكارالىق وتكىزۋ پۋنكتىنە جاقىن اۋماقتا نارازىلىق اكتسياسىن وتكىزگەن.
ولار بيىل قىتايدا ۇستالعان قازاقستان ازاماتى ءالىمنۇر تۇرعانبايدى بوساتۋدى تالاپ ەتىپ، قىتاي تۋى مەن باسشىسىنىڭ سۋرەتىن ورتەگەن.
اكتسيادان كەيىن 11 ادام 7–15 تاۋلىككە اكىمشىلىك قاماۋعا الىنسا، التى بەلسەندىگە 20 اەك كولەمىندە ايىپپۇل سالىنعان.
21 قاراشادا ۇيعىر اۋداندىق سوتى 18 ادامعا بۇلتارتپاۋ شاراسىن قولداندى. ناقتىراق، 13 ادام تەرگەۋ يزولياتورىنا قامالسا، 5 ادام ۇيقاماققا الىندى.
سوتقا جولدانعان ماتەريالدا تەرگەۋشىلەر بەلسەندىلەردىڭ ارەكەتىن 174-باپتىڭ اۋىر ساناتىنا جاتقىزۋدى سۇراعان. اۋداندىق پروكۋرور بۇل ءوتىنىشتى قولداپ، سۋديا باۋىرجان جاقسىباەۆ سانكتسيا بەرگەن.
ادۆوكات شىنقۋات بايجانوۆتىڭ ايتۋىنشا، قاماۋعا الىنعان ادامداردان جاۋاپ الىنباعان، سوت ساراپتاماسى جاسالماعان. ول بۇل ءىستىڭ ساياسي استارى بار ەكەنىن ايتادى.
«وزگە ەلدىڭ تۋىن ورتەگەنى ءۇشىن 174-باپپەن قىلمىستىق ءىس قوزعاۋ — سوت تاجىريبەسىندە بولماعان جاعداي. بۇل – ساياسي اكت. ونىڭ قىلمىستىق قۇرامى جوق»، – دەدى ادۆوكات.
