قايتارىلعان اكتيۆتەردى باسقارۋ كومپانياسى قايرات ساتىبالدىدان مەملەكەتكە وتكەن «بايسات» بازارىن قايتادان اۋكتسيونعا شىعاردى. كومپانيانىڭ حابارلاۋىنشا، قايتالاما ساۋدا-ساتتىق sauda.e-qazyna.kz ەلەكتروندىق پلاتفورماسىندا جاريالانعان، دەپ حابارلايدى "ادىرنا".
اۋكتسيون دەرەكتەرىنە سايكەس، ساۋدا 26 جەلتوقساندا ساعات 11:00-دە وتەدى. لوتتىڭ باستاپقى باعاسى – 26 706 317 643 تەڭگە.
بۇل بازار بيىل قىركۇيەك ايىندا 28,6 ملرد تەڭگەگە ساۋداعا شىعارىلعان ەدى. ەسكە سالايىق، 2024 جىلدىڭ قاڭتارىندا قىلمىستىق ءىس تەرگەۋى بارىسىندا قايرات ساتىبالدى وزىنە تيەسىلى «بايسات» بازارىنىڭ نەگىزگى بولىگىن مەملەكەتكە ەرىكتى تۇردە تاپسىرعان.
وبەكت قۇرامىنا جالپى اۋدانى 4 221,4 شارشى مەتردى جانە 1,4 گەكتار جەر تەلىمىن قامتيتىن ءۇش جىلجىمايتىن مۇلىك نىسانى كىرەدى. بۇعان دەيىن بۇل مۇلىككە قايرات ساتىبالدىنىڭ ۇلى باۋىرجان نۇرسۇلتانعا تيەسىلى «قازگەرستروي» بىرلەسكەن كاسىپورنى» جشس جانە «Astana Finansial Group» جشس ەنشىلەس ۇيىمى يەلىك ەتىپ كەلگەن.
كومپانيا اۋكتسيوننان تۇسكەن قاراجاتتىڭ مەملەكەت كىرىسىنە باعىتتالاتىنىن حابارلادى.
