قازاقستان ەۋرازيا كەڭىستىگىندەگى ماڭىزدى كولىك-لوگيستيكالىق حابقا اينالا الادى، دەپ حابارلايدى "ادىرنا" ۇلتتىق پورتالى.
بۇل تۋرالى پرەزيدەنت قاسىم-جومارت توقاەۆ پورتۋگاليا پرەمەر-ءمينيسترى انتونيۋ كوشتامەن بىرلەسكەن مالىمدەمە بارىسىندا ايتتى.
مەملەكەت باسشىسىنىڭ ايتۋىنشا، كەلىسسوزدەردىڭ نەگىزگى تاقىرىبى — ەكونوميكالىق ىنتىماقتاستىقتى تەرەڭدەتۋ.
«بۇگىن ءبىز ساۋدا-ينۆەستيتسيالىق بايلانىستاردى ارتتىرۋعا جانە ارتاراپتاندىرۋعا ۋاعدالاستىق. قازاقستان ەۋروپالىق بيزنەسكە ارنالعان تۇراقتى ءارى اشىق ينۆەستيتسيالىق كليمات قالىپتاستىرۋدى جالعاستىرا بەرەدى. ەنەرگيا تيىمدىلىگى، اسا ماڭىزدى مينەرالدار، تسيفرلىق تەحنولوگيالار جانە كولىك بايلانىسى سالالارىندا ىنتىماقتاستىققا زور مۇمكىندىك بار»، — دەدى توقاەۆ.
پرەزيدەنت كەلىسسوزدەر كەزىندە كولىك-لوگيستيكا باعىتتارىن دامىتۋ، سونىڭ ىشىندە ترانسكاسپي حالىقارالىق كولىك باعدارى بويىنشا بىرلەسكەن جۇمىستى كۇشەيتۋ ماسەلەسى تالقىلانعانىن اتاپ ءوتتى.
«قازاقستان مەن ەۋروپالىق وداق اراسىنداعى ۇيلەستىرۋ پلاتفورماسىنىڭ جۇمىسىن جانە ەو-نىڭ Global Gateway باستاماسىن قۇپتايمىز. قازاقستان ورتالىق ازياعا ارنالعان 12 ملرد ەۋرولىق ينۆەستيتسيالىق پاكەتكە قولداۋ بىلدىرەدى. بۇل قاراجات كولىك، شيكىزات، ‘جاسىل’ ەنەرگەتيكا جانە تسيفرلىق تەحنولوگيا جوبالارىن دامىتۋعا باعىتتالادى. بىرلەسكەن كۇش-جىگەر ارقىلى قازاقستاندى ەۋرازياداعى باستى كولىك توراپتارىنىڭ بىرىنە اينالدىرا الاتىنىمىزعا سەنىمدىمىز»، — دەدى مەملەكەت باسشىسى.
سونىمەن قاتار تاراپتار ەنەرگەتيكالىق قاۋىپسىزدىك، رەسۋرستاردى تۇراقتى جەتكىزۋ، اسا ماڭىزدى مينەرالدار، اتوم ەنەرگەتيكاسى، مۇناي حيمياسى جانە جاڭارتىلاتىن ەنەرگيا سالالارىنداعى ىنتىماقتاستىقتى كەڭەيتۋ ماسەلەلەرىن تالقىلادى.
توقاەۆتىڭ ايتۋىنشا، قازاقستاننىڭ ماقساتى — شيكىزات ەكسپورتتاۋمەن شەكتەلمەي، ەۋروپالىق ستاندارتتارعا ساي تەرەڭ وڭدەيتىن وندىرىستەردى دامىتۋ جانە قوسىلعان قۇنى جوعارى ءونىم شىعارۋ ارقىلى ەۋرووداقتىڭ جەتكىزۋ تىزبەگىنە تەرەڭ ينتەگراتسيالانۋ.
