Qazaqstan Euraziia keŋıstıgındegı maŋyzdy kölık-logistikalyq habqa ainala alady, dep habarlaidy "Adyrna" ūlttyq portaly.
Būl turaly Prezident Qasym-Jomart Toqaev Portugaliia premer-ministrı Antoniu Koştamen bırlesken mälımdeme barysynda aitty.
Memleket basşysynyŋ aituynşa, kelıssözderdıŋ negızgı taqyryby — ekonomikalyq yntymaqtastyqty tereŋdetu.
«Bügın bız sauda-investisiialyq bailanystardy arttyruǧa jäne ärtaraptandyruǧa uaǧdalastyq. Qazaqstan europalyq bizneske arnalǧan tūraqty ärı aşyq investisiialyq klimat qalyptastyrudy jalǧastyra beredı. Energiia tiımdılıgı, asa maŋyzdy mineraldar, sifrlyq tehnologiialar jäne kölık bailanysy salalarynda yntymaqtastyqqa zor mümkındık bar», — dedı Toqaev.
Prezident kelıssözder kezınde kölık-logistika baǧyttaryn damytu, sonyŋ ışınde Transkaspii halyqaralyq kölık baǧdary boiynşa bırlesken jūmysty küşeitu mäselesı talqylanǧanyn atap öttı.
«Qazaqstan men Europalyq Odaq arasyndaǧy üilestıru platformasynyŋ jūmysyn jäne EO-nyŋ Global Gateway bastamasyn qūptaimyz. Qazaqstan Ortalyq Aziiaǧa arnalǧan 12 mlrd eurolyq investisiialyq paketke qoldau bıldıredı. Būl qarajat kölık, şikızat, ‘jasyl’ energetika jäne sifrlyq tehnologiia jobalaryn damytuǧa baǧyttalady. Bırlesken küş-jıger arqyly Qazaqstandy Euraziiadaǧy basty kölık toraptarynyŋ bırıne ainaldyra alatynymyzǧa senımdımız», — dedı Memleket basşysy.
Sonymen qatar taraptar energetikalyq qauıpsızdık, resurstardy tūraqty jetkızu, asa maŋyzdy mineraldar, atom energetikasy, mūnai himiiasy jäne jaŋartylatyn energiia salalaryndaǧy yntymaqtastyqty keŋeitu mäselelerın talqylady.
Toqaevtyŋ aituynşa, Qazaqstannyŋ maqsaty — şikızat eksporttaumen şektelmei, europalyq standarttarǧa sai tereŋ öŋdeitın öndırısterdı damytu jäne qosylǧan qūny joǧary önım şyǧaru arqyly Euroodaqtyŋ jetkızu tızbegıne tereŋ integrasiialanu.
