الماتىدا جەكە ستوماتولوگيالىق كلينيكادا ەم قابىلداعان ءۇش جاستاعى بالا قايتىس بولدى. بۇل تۋرالى Tengrinews.kz رەداكتسياسىنا مارقۇم ءبۇلدىرشىننىڭ تۋىستارى مالىمدەگەن، دەپ حابارلايدى "ادىرنا".
اتا-اناسى دارىگەرلەردىڭ سالعىرتتىققا جول بەرگەنىن ايتىپ، بۇل ولىمگە ىقپال ەتۋى مۇمكىن دەپ ەسەپتەيدى.
قايعىلى جاعدايدان كەيىن پوليتسيا قىلمىستىق ءىس قوزعاعان، الايدا ەكى ايدان سوڭ ءىس توقتاتىلعان. تۋىستارى بۇل شەشىممەن كەلىسپەي وتىر.
بالا 13 ءساۋىر كۇنى تاڭەرتەڭ جوسپارلانعان ستوماتولوگيالىق وپەراتسياعا جەتكىزىلگەن. تاتەسىنىڭ ايتۋىنشا، دارىگەرلەر 20 ءتىس ەمدەلەتىنىن، پروتسەدۋرانىڭ ءتورت ساعاتقا سوزىلاتىنىن ايتقان.
«بالانى 7:00-دە وپەراتسياعا اپاردى. ول بەس جارىم ساعاتتان ارتىققا سوزىلدى، “سەۆورانمەن” جاسالدى. 13:30-دا شىعارىپ بەرگەندە بالا ءالسىز كۇيدە بولدى. بىزگە ۇيگە اپارا بەرۋگە بولادى دەدى، باقىلاۋدا قالدىرمادى»، – دەيدى ول.
ۇيگە كەلگەن سوڭ بالا ەسىن تولىق جيا الماعان. سول كۇنى كەشكە جاعدايى ناشارلاپ، ۇستامالار باستالعان.
«جەدەل جاردەم ۇزاق كەلمەدى. اتا-اناسى وزدەرى اۋرۋحاناعا بارعان، بىراق قۇتقارا المادى»، – دەيدى تۋىسى.
بالا 13 ساۋىردە قايتىس بولعان.
مارقۇمنىڭ تۋىسى قىلمىستىق ءىس قوزعالعانىن، الايدا ەكى ايدان سوڭ جابىلعانىن ايتادى.
ء«بىزدى حابارلاندىرمادى. اكەسى روۆد-عا بارعان كەزدە عانا ءىس توقتاتىلعانىن ءبىلدى. ەشكىم جاۋاپقا تارتىلمادى. تەرگەۋ ءۇستىرت جۇرگىزىلدى»، – دەيدى ول.
اتا-اناسى كلينيكاعا سوتقا دەيىنگى شاعىم جولداعان. وندا ولار بالانىڭ جاعدايى ناشارلاعانىن بىرنەشە رەت حابارلاعانىن، الايدا كلينيكا قىزمەتكەرلەرى ء«بارى قالىپتى» دەپ سەندىرگەنىن جازعان.
سوت-مەديتسينالىق ساراپتاما بويىنشا بالانىڭ ولىمىنە مي ءىسىنۋى بار ەنتسەفالوپاتيا، جەدەل بۇيرەك جەتكىلىكسىزدىگى، جەدەل جرۆي سەبەپ بولعان.
تۋىستار بۇل قورىتىندىمەن كەلىسپەيدى.
«بالادا وپەراتسيا الدىندا ەشقانداي ۆيرۋستىق بەلگىلەر بولماعان. قان تالداۋى دا ونى كورسەتەدى»، – دەيدى وتباسى.
ولار بالانىڭ ولىمىنە ۇزاق ناركوز جانە “سەۆوراندى” قولدانۋ سەبەپ بولدى دەپ سانايدى.
«قازىر تولىق جانە وبەكتيۆتى تەرگەۋدى قامتاماسىز ەتۋگە باعىتتالعان شارالار جۇرگىزىلىپ جاتىر. ماتەريالدار ساپا مەن قاۋىپسىزدىك بويىنشا ۋاكىلەتتى ورگانعا جولداندى»، – دەپ جاۋاپ بەردى.
كلينيكا ادۆوكاتى ەلەنا جاناتوۆا دارىگەرلەردىڭ ارەكەتى حاتتاماعا سايكەس بولعانىن ايتادى.
«جرۆي بەلگىلەرى انىقتالعان جوق، ناركوزعا قارسى كورسەتىلىم بولمادى»، – دەيدى ول.
سونىمەن قاتار، ول 20 ءتىستى ءبىر سەانستا ەمدەۋ حالىقارالىق پراكتيكاعا ساي ەكەنىن اتاپ ءوتتى.
«پروتسەدۋرا كەزىندە ومىرلىك كورسەتكىشتەرى تۇراقتى بولدى. ويانعاننان كەيىن انەستەزيولوگ قاراپ، ۇيىنە جىبەردى»، – دەدى ادۆوكات.
كلينيكا بارلىق مەديتسينالىق قۇجاتتى تەرگەۋشىلەرگە تاپسىرعان.
ايتا كەتسەك، بۇعان دەيىن استانادا ءۇش جاسار قىز جەكە كلينيكادا 18 ءتىس ەمدەلگەننەن كەيىن قايتىس بولعان. پروتسەدۋرا 3,5 ساعاتقا سوزىلعان. قازىر ءىس سوتتا قارالۋدا.
ستوماتولوگ يسكاندەر يشانوۆتىڭ ايتۋىنشا، «سەۆوران» قولدانىلعان جاعدايدا كوپ ءتىستى ءبىر سەانستا ەمدەۋ قالىپتى تاجىريبە.
الايدا ول قاۋىپسىزدىك دارىگەر مەن انەستەزيولوگتىڭ تاجىريبەسىنە تىكەلەي بايلانىستى ەكەنىن ايتادى.
«كەي كلينيكالار الەۋمەتتىك جەلىدەگى جارناماعا عانا نازار اۋدارادى. ال اتا-انالار دارىگەردىڭ تاجىريبەسىنە قارامايدى – بۇل ۇلكەن قاۋىپ»، – دەيدى مامان.
ول سونداي-اق ليتسەنزياسىز «سەۆوران» قولداناتىن كلينيكالار بارىن ايتتى.
