فوتو: Kursiv.kz
الماتىدا Social Impact Awards 2025 قايىرىمدىلىق اۋكتسيونى ءوتتى. وندا دىنمۇحامەد قوناەۆتىڭ گالستۋگى مەن دەنيس تەننىڭ راريتەت كونكيى ساۋدالاندى، دەپ زابارلايدى “ادىرنا” پورتالى Kursiv.Media سايتىنا سىلتەپ.
اقپاراتقا سايكەس، اۋكتسيون لوتتارى اراسىندا قازاقستان تەننيس فەدەراتسياسى، د.ا. قوناەۆ قورى، دەنيس تەن قورى، لەرمونتوۆ اتىنداعى تەاتر، گەرولد بەلگەردىڭ وتباسى، سۋرەتشى اسەل كەنجەتاەۆا جانە باسقا دا تۇلعالاردىڭ سيرەك كەزدەسەتىن بىرەگەي زاتتارى بولدى.
كوپشىلىكتىڭ نازارى اۋعان لوتتاردىڭ ءبىرى – اتاقتى مانەرلەپ سىرعاناۋشىعا تيەسىلى كونكي. باستاپقى باعاسى 500 مىڭ تەڭگە بولعانىمەن، قۇنى ساۋدا بارىسىندا بەس ەسەگە كوتەرىلدى. ەڭ جوعارى باعانى قازاق ەستراداسىنىڭ ءانشىسى عالىمجان مولدانازار ۇسىندى. ول كونكيلەردى 2,5 ملن تەڭگەگە ساتىپ الدى.
«مەن دەنيسپەن تانىس ەدىم، ارالاسىپ تۇراتىنبىز. وتە مەيىرىمدى، كەرەمەت جىگىت ەدى. سول كۇندەردىڭ ەستەلىگى رەتىندە ونىڭ كونكيلەرى ماعان بۇيىرعانىنا قۋاندىم»، – دەدى ءارتىس.
اۋكتسيونعا قويىلعان ەڭ قىمبات زات – ساياسي قايراتكەر دىنمۇحامەد قوناەۆتىڭ گالستۋگى. ونى قازاقستاندىق بيزنەسمەن ەركىن تاتىشەۆ 12 ملن تەڭگەگە ساتىپ الدى.
سونىمەن بىرگە اۋكتسيوندا ۆياچەسلاۆ ليۋيكونىڭ «اسقانعا توسقان» سپەكتاكلىنە دايىنداعان ەسكيزى، دانيل مەدۆەدەۆ قولتاڭباسى بار تەننيس دوبى، اسەل كەنجەتاەۆانىڭ «ترۋبكا ۇستاعان ايەل» كارتيناسى قويىلدى. بۇعان قوسا، پيتەر فوستەر مەن سەرىك تولەكپاەۆپەن كەزدەسۋ مۇمكىندىگى سياقتى لوتتار ۇسىنىلدى.
جينالعان 87 ملن تەڭگە الەۋمەتتىك جوبالارعا گرانت رەتىندە بەرىلەدى، ال اۋكتسيوننان تۇسكەن قاراجات ءىز-ءتۇسسىز جوعالعان ادامداردى ىزدەۋمەن اينالىساتىن Lider.kz ەرىكتىلەر بىرلەستىگىن قولداۋعا جۇمسالادى.
