فوتو: ونەركاسىپ جانە قۇرىلىس مينيسترلىگى
قازاقستاندا گەولوگيالىق زەرتتەۋ جۇمىستارى كۇشەيتىلىپ، پەرسپەكتيۆالى جەر قويناۋى تەلىمدەرىن ينۆەستورلارعا ۇسىنۋ جوسپارلانىپ وتىر. العاشقى ۋچاسكەلەر 2027 جىلدان باستاپ اۋكتسيون ارقىلى ساتىلىمعا شىعارىلماق.
قر ونەركاسىپ جانە قۇرىلىس مينيسترلىگىنىڭ مالىمەتىنشە، 2024 جانە 2025 جىلدار ارالىعىندا 54 جاڭا كەن ورنى تىركەلگەن. ەل سونىمەن قاتار گەولوگيالىق بارلاۋ جۇمىستارىن كەڭەيتىپ، جيناقتالعان دەرەكتەردى تسيفرلاندىرۋدا جانە جاڭا قورلاردى بارلاۋ ءۇشىن زاماناۋي تەحنولوگيالاردى پايدالانۋدا. قازىر 20 ۋچاسكەسىندە گەولوگيالىق زەرتتەۋ جۇرگىزىلىپ جاتىر. بيىل 1:50 000 ماسشتابتاعى گەولوگيالىق ءتۇسىرىلىم جۇمىستارى باستالعان. زەرتتەۋ جۇمىستارى 11 ءوڭىردى قامتيدى، ال جالپى اۋماق 100 مىڭ شارشى شاقىرىمنان اسادى.
ۇلىتاۋ وبلىسىندا جەتى ۋچاسكەدە كەشەندى گەولوگيالىق زەرتتەۋ جۇرگىزىلۋدە. ونىڭ جالپى اۋماعى 36 مىڭ شارشى شاقىرىمدى قۇرايدى.
زەرتتەۋ بارىسىندا زاماناۋي تەحنولوگيالار قولدانىلىپ جاتىر. ماماندار اەروماگنيتتىك ءتۇسىرىلىم، اەروگامما-سپەكترومەتريا، اەروگراۆيمەتريا، جەردى قاشىقتان زوندتاۋ جانە ۇشقىشسىز اەروگەوفيزيكالىق كەشەندەر ارقىلى مالىمەت جيناۋدا. سونداي-اق جوعارى دالدىكتەگى Ionic Leach گەوحيميالىق ءادىسى پايدالانىلۋدا.
ۇلىتاۋ جانە اباي وبلىستارىندا بۇعان دەيىن شامامەن 300 ۇڭعىما بۇرعىلانعان.
ونەركاسىپ جانە قۇرىلىس ءمينيسترى ەرسايىن ناعاسپاەۆتىڭ ايتۋىنشا، گەولوگيالىق زەرتتەۋلەردىڭ نەگىزگى ماقساتى — جەر قويناۋى تۋرالى ساپالى ءارى ناقتى اقپارات قالىپتاستىرۋ. بۇل ءوز كەزەگىندە گەولوگيالىق بارلاۋعا ينۆەستيتسيا تارتۋعا جانە ونەركاسىپ سالالارىن دامىتۋعا مۇمكىندىك بەرەدى.
مەملەكەتتىك گەولوگيالىق زەرتتەۋ باعدارلاماسى اياسىندا پەرسپەكتيۆالى ۋچاسكەلەردىڭ بىرىڭعاي تسيفرلىق كاداسترى دا جاسالىپ جاتىر. ءار ۋچاسكەگە ەلەكتروندى پاسپورت ازىرلەنىپ، وندا ونىڭ گەولوگيالىق الەۋەتى تۋرالى اقپارات جيناقتالادى.
مينيسترلىك بۇل جۇيە گەولوگيالىق اقپاراتتىڭ اشىقتىعىن ارتتىرىپ، ينۆەستورلار ءۇشىن قاجەتتى مالىمەتتەردى الۋدى جەڭىلدەتەتىنىن اتاپ ءوتتى.
