قىزىلوردا قالاسىندا ساۋدا ورتالىعىنىڭ الدىندا جەرگە شاشىلعان قوقىستى جيناپ، جاشىككە تاستاپ جۇرگەن كىشكەنتاي بالانىڭ بەينەجازباسى الەۋمەتتىك جەلىدە كەڭىنەن تارادى، دەپ حابارلايدى "ادىرنا" ۇلتتىق پورتالى.
كوپشىلىكتى سۇيسىندىرگەن ءبۇلدىرشىن — جاسى ۇشكە تولماعان ءازيزحان سەرىك.
بەينەجازبانى اناسى ايزات جۇماعالي وتباسىمەن بىرگە كينوتەاتردان شىققان ساتتە ءتۇسىرىپ العان. ونىڭ ايتۋىنشا، بالا جەردە جاتقان قوقىستى بىرىنەن سوڭ ءبىرىن الىپ، ارنايى جاشىككە تاستاپ جۇرگەن.
"تاسكيگە بارا جاتقاندا ءازيزحان اينالاداعى قوقىستى جيناي باستادى. بالامنىڭ ءتىلى ازىرگە كەش شىعىپ كەلەدى، سوندىقتان ءاربىر ارەكەتىن ءجيى ۆيدەوعا ءتۇسىرىپ وتىرامىن. تازالىققا دەگەن ادەتتى اجەسىنەن ۇيرەندى. ۆيدەونى ازىلدەپ، تۋىستار مەن دوستاردىڭ WhatsApp توبىنا سالعان ەدىم. ولار ءبىر-بىرىنە تاراتىپ، ۇلىم ءبىر كۇندە تانىمال بولىپ كەتتى", — دەدى اناسى.
بالانىڭ بۇل يگى ءىسى نازاردان تىس قالمادى. «قىزىلوردا تازالىعى» مەكەمەسىنىڭ ۇجىمى ءبۇلدىرشىندى اتا-اناسىمەن بىرگە ارنايى شاقىرىپ، العىس ءبىلدىرىپ، ماراپاتتادى.
"بۇل ارەكەت ءبىزدى دە تولقىتتى. كىشكەنتاي بولسا دا، ءازيزحاننىڭ جاساعان قادامى — بارشاعا ۇلگى. تازالىق — جاۋاپكەرشىلىكتەن باستالادى، ال ول وسىنىڭ جارقىن دالەلى", — دەدى كاسىپورىن ديرەكتورى ساپارعالي اسىلبەكوۆ.
