الماتى وبلىسىندا حالىقارالىق Alatau Investment Forum 2025 ءوتتى. فورۋمعا كورشى مەملەكەتتەردەن 300-دەن استام ينۆەستور مەن بيزنەس وكىلى قاتىسىپ، ناتيجەسىندە جالپى قۇنى 776 ملرد تەڭگەدەن اساتىن 16 مەموراندۋمعا قول قويىلدى. بۇل ءوڭىردىڭ قازاقستانداعى جەتەكشى ينۆەستيتسيالىق ورتالىقتاردىڭ ءبىرى ەكەنىن تاعى دالەلدەدى.
جيىندا وبلىستىڭ بوس وندىرىستىك ايماقتارى، يندۋستريالدى زونالارى، لوگيستيكالىق حابتارى جانە ءىرى جوبالاردى قابىلداۋعا دايىن ينفراقۇرىلىمدىق مۇمكىندىكتەرى تانىستىرىلدى. قاتىسۋشىلارعا ونەركاسىپ، اۋىل شارۋاشىلىعى، قايتا وڭدەۋ جانە تۋريزم باعىتتارى بويىنشا ۇسىنىستار جاسالدى.
فورۋمدى اشقان الماتى وبلىسىنىڭ اكىمى مارات سۇلتانعازيەۆ وڭىردە ينۆەستورلارعا قولايلى جاڭا ەكونوميكالىق كەزەڭ باستالعانىن اتاپ ءوتتى. ونىڭ ايتۋىنشا، وبلىستىڭ اشىقتىعى مەن ينۆەستيتسيا تارتۋعا دايىن بولۋى — ناقتى قولداۋمەن بەكىتىلگەن ستراتەگيالىق باعىت. اكىم ءوڭىردىڭ قارقىندى دامىپ جاتقانىن، زاماناۋي ينفراقۇرىلىم، 7 جۇمىس ىستەپ تۇرعان جانە 9 قۇرىلۋ كەزەڭىندەگى يندۋستريالدى ايماق، لوگيستيكالىق پاركتەر، گچپ تەتىكتەرى جانە ء«بىر تەرەزە» فورماتىنداعى تسيفرلىق سەرۆيستەر ىسكە قوسىلعانىن ايتتى.
«بۇگىندە ينۆەستورلاردىڭ سەنىمى ناقتى ساندارمەن كورىنىس تابۋدا. ءبىز جالپى قۇنى 6,2 ترلن تەڭگەنى قۇرايتىن 216 جوبانى باقىلاۋدا ۇستاپ وتىرمىز. ولاردىڭ جۇزەگە اسۋى 80 مىڭنان استام تۇراقتى جۇمىس ورنىن قۇرۋعا مۇمكىندىك بەرەدى. 72 جوبا شەتەلدىك كاپيتالدىڭ قاتىسۋىمەن ىسكە اسۋدا، قۇنى — 3,9 ترلن تەڭگە. بۇل — حالىقارالىق كومپانيالاردىڭ وبلىستى ۇزاق مەرزىمدى دامۋ الاڭى رەتىندە تاڭداۋىنىڭ ايقىن دالەلى»، — دەدى مارات سۇلتانعازيەۆ.
فورۋم قورىتىندىسىندا جالپى قۇنى 776 ملرد تەڭگەدەن اساتىن 16 مەموراندۋمعا قول قويىلدى. قۇجاتتار ونەركاسىپ، اگروسەكتور، لوگيستيكا، ەنەرگەتيكا جانە تۋريزم باعىتتارىن قامتيدى. كەلىسىمدەر اياسىندا حالىقارالىق قۇرىلىس كومپانياسىنىڭ جوباسى، LED-ەكراندار ءوندىرىسى، تراكتور شىعاراتىن زاۋىت، ءىرى يندۋستريالدى-لوگيستيكالىق كەشەن جانە زاماناۋي كوتەرمە-تاراتۋ ورتالىعى ىسكە اسىرىلماق.
بۇل كەلىسىمدەر ءوڭىر ەكونوميكاسىن جاڭعىرتاتىن ناقتى ينۆەستيتسيالىق شەشىمدەر بولىپ سانالادى. جاڭا وندىرىستەر اشىلىپ، قايتا وڭدەۋ سالاسى كۇشەيەدى، اۋىل شارۋاشىلىعى جاڭارىپ، تۋريزم ينفراقۇرىلىمى داميدى، ەنەرگەتيكالىق جوبالارعا سەرپىن بەرىلەدى.
فورۋمعا قىتاي حالىق رەسپۋبليكاسىنىڭ تسينداو قالاسى اكىمىنىڭ ورىنباسارى گاو تسزيان، ورتالىق مەملەكەتتىك ورگانداردىڭ وكىلدەرى، حالىقارالىق كورپوراتسيالار مەن ءىرى ينۆەستورلار قاتىستى. گاو تسزيان الماتى وبلىسىمەن ارىپتەستىكتى كەڭەيتۋگە ۇلكەن مۇمكىندىك بارىن ايتىپ، تسينداونىڭ قىتايداعى ءىرى پورتتىق، وندىرىستىك جانە لوگيستيكالىق ورتالىقتاردىڭ ءبىرى ەكەنىن ەسكە سالدى. ونىڭ ايتۋىنشا، ەكى ءوڭىردىڭ ارتىقشىلىقتارى ءبىرىن-ءبىرى تولىقتىرىپ، اۆتوموبيل جاساۋ، جوعارى تەحنولوگيالىق جابدىق، جاسىل ەنەرگەتيكا، بيومەديتسينا، ساۋدا جانە لوگيستيكا سالالارىندا بىرلەسكەن جوبالارعا جول اشادى.
«الماتى وبلىسىمەن ىنتىماقتاستىق بىرنەشە پەرسپەكتيۆالى باعىتتى قامتيدى. ءبىز بىرگە جاڭا وندىرىستەر اشىپ، زاماناۋي تەحنولوگيالار ەنگىزىپ، كولىك دالىزدەرىنىڭ تيىمدىلىگىن ارتتىرا الامىز»، — دەدى ول.
سوڭعى جىلدارى الماتى وبلىسى ينۆەستيتسيالىق ءوسىمدى تۇراقتى كورسەتىپ كەلەدى: 2022 جىلى — 614 ملرد تەڭگە، 2024 جىلى — 1 ترلن تەڭگەدەن جوعارى، ال 2025 جىلدىڭ 10 ايىندا 834 ملرد تەڭگە يگەرىلىپ، فيزيكالىق كولەم يندەكسى 116% بولدى. جىل سوڭىنا دەيىن ينۆەستيتسيا كولەمىن 1,3 ترلن تەڭگەگە جەتكىزۋ جوسپارلانىپ وتىر.
وڭىردە سوڭعى جىلدارى بىرنەشە ءىرى نىسان ىسكە قوسىلدى: «Focus Logistics» لوگيستيكالىق پاركى، «التىن تاعا» بەتون زاۋىتى، «LC Waikiki» كوتەرمە ورتالىعى، «كەگەنمياسپروم» ەت كومبيناتى، «شين-لاين» بالمۇزداق فابريكاسى جانە كەڭەيتىلگەن «قاپشاعاي بيداي ونىمدەرى» اگروكومپلەكسى. جىل سوڭىنا دەيىن «MP Solution»، «Kusto Logistics»، «ەۋرازيالىق لوگيستيكالىق پارك»، «Imagine Apple Logistics» سياقتى ا كلاسىنداعى جاڭا لوگيستيكالىق كەشەندەر پايدالانۋعا بەرىلەدى. سونىڭ ارقاسىندا ءوڭىردىڭ زاماناۋي لوگيستيكالىق قۋاتى 16 ەسەگە ءوسىپ، 7 مىڭنان 111 مىڭ شارشى مەترگە دەيىن ۇلعايدى.
تاماق ونەركاسىبىندە ەكسپورتقا باعىتتالعان وندىرىستەر دە كۇشەيۋدە: «Galanz Bottlers»، «QAZAQ GLOBAL FOOD» جانە «پريما قۇس» سونىڭ دالەلى. بارلىق ىسكە اسىپ جاتقان جوبالار مەن فورۋم اياسىندا جاسالعان كەلىسىمدەر الماتى وبلىسىنىڭ ينۆەستيتسيالىق كارتاسىن جاڭا دەڭگەيگە شىعارىپ، ءوڭىردى ەل ەكونوميكاسىنىڭ نەگىزگى درايۆەرلەرىنىڭ بىرىنە اينالدىرىپ وتىر.
