«تاما شەجىرەسى» جارىق كوردى

ۇزاق جىلعى ىزدەنىستەن كەيىن، العاش رەت بارشا تاما رۋىنا ورتاق شەجىرە «تاما شەجىرەسى» كىتابى جارىق كوردى. بۇعان دەيىن وڭىرلەردە، رۋدىڭ بولىمدەرى مەن تارماقتارى بويىنشا جەكەلەي كىتاپتار شىققانىمەن، ورتاق كىتاپ جارىق كورمەگەن بولاتىن.

وسى جۇمىستاردى اتقارۋدى سارىسۋلىق ولكەتانۋشى، قالامگەر، تاريح زەرتتەۋشىسى نۇرلان سۇلتانۇلى راحىمجانوۆ ءوز جاۋاپكەرشىلىگىنە الىپ، ەلدىڭ اماناتىن ارقالادى. جەتى جىلدىڭ ىشىندە قازاقستاننىڭ بارلىق دەرلىك وبلىستارى، وزبەكستان مەن رەسەيدىڭ كوپتەگەن اۋماقتارىن ارالاپ شىقتى. وسى جولدا مىڭداعان ەلدى مەكەندەر مەن سان مىڭداعان ادامدارمەن جولىعىپ، مىڭنان اسا كىتاپتى اقتاردى، مىڭداعان قولجازبالارمەن تانىستى.

ەرتەدەن اۋىز-ەكى شەجىرەلەردە قالىپتاسقان «التى اتا ءالىپ، جەتى اتا جوگى» ۇعىمىن باسقاشا تالداپ، ەلدىڭ جادىنان شىققان اتا ۇرپاقتارىن تاۋىپ، ەلدىڭ نازارىنا ۇسىنىپ وتىر. كەشەگى ءبۇتىن تۇركى حالقىنىڭ زامانا اعىمىندا بىرنەشە ۇلىسقا ءبولىنىپ، ءارتۇرلى حالىققا اينالىپ كەتكەنى امبەگە ايان. دەگەنمەن، ولاردىڭ اراسىنا كىرىپ، تۇبەگەيلى ءسىڭىپ كەتكەن ءوز رۋلاستارىن تاۋىپ، ولاردىڭ تاريحىن سۇراستىرىپ، شەجىرەسىن جازىپ الىپ كەلۋى ەرەسەن ەڭبەك. كوشپەلى ومىردەن باس تارتىپ، وتىرىقشىلىققا ەرتە بوي ۇسىنعان اعايىندارعا قايتا-قايتا بارىپ ءجۇرىپ قولىنا تۇسكەن مالىمەتتەرىن سارالاپ وسى ەڭبەككە ەنگىزدى.
قازاق، وزبەك، قاراقالپاق، نوعاي، قۇمىق، قىرىم تاتارى، دوبرۋدجا تاتارى، باشقۇرت، تاتار حالىقتارى قۇرامىنا سىڭگەن رۋلاستارىن تاپتى. ولاردىڭ بىرقاتارىنىڭ شەجىرە دەرەكتەرىن جالپى كوپشىلىك نازارىنا العاش ۇسىنىپ وتىر.
اۋىزەكى ايتىلىپ جۇرگەن شەجىرەلىك دەرەكتەر قۇلپىتاستارمەن، ارحيۆ قۇجاتتارىمەن، كونە قولجازبالارمەن سالىستىرىلىپ تۇزەتىلدى. بۇل كىتاپتىڭ ارتىنان "تامالار" اتتى ەنتسيكلوپەديالىق انىقتامالىق دايىندالۋدا.

كىتاپ 2000 دانامەن الماتى قالاسىنداعى «AliPress» باسپاسىنان جارىق كوردى.