قازاق ءباسپاسوزىنىڭ تاريحىندا وزىندىك ورنى بار «اقيقات» جۋرنالىنىڭ جارىق كورگەنىنە 105 جىل تولدى، دەپ حابارلايدى "ادىرنا".
باسىلىمنىڭ العاشقى سانى 1921 جىلعى 15 قىركۇيەكتە ورىنبور قالاسىندا «قىزىل قازاقستان» اتاۋىمەن جارىق كورگەن.
جۋرنالدىڭ العاشقى ءنومىرى توتە جازۋمەن باسىلىپ، جالپى كولەمى 43 بەتتى قۇراعان. وندا سول كەزەڭدەگى قوعام ءۇشىن وزەكتى ماسەلەلەر قامتىلعان.
العاشقى نومىردە قالىڭ مال مەن قۇن تولەۋگە قاتىستى دەكرەت جاريالانعان. قۇجاتقا الىبەكوۆ پەن بوكەيحانوۆ قول قويعان. سونداي-اق ەكىنشى جالپى قازاق سەزىنىڭ قاۋلىسى باسىلىپ، وعان كىندىك كوميتەتتىڭ باستىعى مەڭدەشوۆ قول قويعان.
باسىلىمدا قازاقستانداعى قوعامدىق-ساياسي ماسەلەلەرمەن قاتار، شەتەل جاڭالىقتارىنا دا ورىن بەرىلگەن. اتاپ ايتقاندا، قىتاي، كورەيا، شۆەيتساريا، اۋعانستان جانە يتالياداعى جاعداي تۋرالى اقپاراتتار جاريالانعان
زەرتتەۋشىلەردىڭ مالىمەتىنشە، جۋرنالدىڭ العاشقى نومىرلەرىندەگى كوپتەگەن ماقالانىڭ اۆتورى كورسەتىلمەگەن. كەيبىر ماتەريالدار «ستەپنايا پراۆدا» گازەتىنەن اۋدارىلىپ باسىلعان. سونىمەن بىرگە وتكەن عاسىردىڭ باسىنداعى قازاقستانداعى قوعامدىق جاعداي، ۇگىت-ناسيحات جۇمىستارى جانە جاڭا بيلىكتىڭ ساياساتى تۋرالى ماتەريالدار جارىق كورگەن.
جۋرنالدا كەدەيلەر مەن شارۋالارعا قاتىستى مەملەكەتتىك ساياسات، جاڭا وكىمەت تۇسىنداعى سايلاۋ قۇقىعى جانە وسى باعىتتاعى ءتۇسىندىرۋ جۇمىستارى ءسوز بولعان.
باسىلىمنىڭ قۇرىلىمى «باسقارمادان» اتتى كىرىسپە بولىمنەن باستالىپ، كەيىن ساياسي، ەكونوميكالىق، جاستار ماسەلەلەرىنە ارنالعان بولىمدەرگە بولىنگەن. سونىمەن قاتار ەل ىشىندەگى جانە شەتەلدەگى جاعدايلار، ءتۇرلى جاڭالىقتار قامتىلعان.
1932 جىلدان 1941 جىلعا دەيىن جۋرنال «كوممۋنيست» دەگەن اتاۋمەن شىقتى. ۇلى وتان سوعىسى جىلدارىندا باسىلىمنىڭ جارىق كورۋىنە ءۇزىلىس جاسالىپ، 1947 جىلى قايتادان وقىرمانعا جول تارتتى.
1952 جىلى جۋرنالدىڭ اتاۋى «قازاقستان كوممۋنيسى» بولىپ وزگەرتىلدى.
قازاقستان تاۋەلسىزدىك العاننان كەيىن باسىلىمنىڭ مازمۇنى مەن باعىتى دا جاڭاردى. 1991 جىلدىڭ قىركۇيەگىنەن باستاپ جۋرنال «اقيقات» اتاۋىمەن جارىق كورىپ كەلەدى.
وسىلايشا، 1921 جىلى «قىزىل قازاقستان» دەگەن اتاۋمەن العاش جارىق كورگەن باسىلىم بيىل ءوزىنىڭ 105 جىلدىق مەرەيتويىن اتاپ وتىر.
