Qazaq baspasözınıŋ tarihynda özındık orny bar «Aqiqat» jurnalynyŋ jaryq körgenıne 105 jyl toldy, dep habarlaidy "Adyrna".
Basylymnyŋ alǧaşqy sany 1921 jylǧy 15 qyrküiekte Orynbor qalasynda «Qyzyl Qazaqstan» atauymen jaryq körgen.
Jurnaldyŋ alǧaşqy nömırı töte jazumen basylyp, jalpy kölemı 43 bettı qūraǧan. Onda sol kezeŋdegı qoǧam üşın özektı mäseleler qamtylǧan.
Alǧaşqy nömırde qalyŋ mal men qūn töleuge qatysty dekret jariialanǧan. Qūjatqa Älıbekov pen Bökeihanov qol qoiǧan. Sondai-aq Ekınşı jalpy qazaq sezınıŋ qaulysy basylyp, oǧan Kındık komitettıŋ bastyǧy Meŋdeşov qol qoiǧan.
Basylymda Qazaqstandaǧy qoǧamdyq-saiasi mäselelermen qatar, şetel jaŋalyqtaryna da oryn berılgen. Atap aitqanda, Qytai, Koreia, Şveisariia, Auǧanstan jäne İtaliiadaǧy jaǧdai turaly aqparattar jariialanǧan
Zertteuşılerdıŋ mälımetınşe, jurnaldyŋ alǧaşqy nömırlerındegı köptegen maqalanyŋ avtory körsetılmegen. Keibır materialdar «Stepnaia pravda» gazetınen audarylyp basylǧan. Sonymen bırge ötken ǧasyrdyŋ basyndaǧy Qazaqstandaǧy qoǧamdyq jaǧdai, ügıt-nasihat jūmystary jäne jaŋa bilıktıŋ saiasaty turaly materialdar jaryq körgen.
Jurnalda kedeiler men şarualarǧa qatysty memlekettık saiasat, jaŋa ökımet tūsyndaǧy sailau qūqyǧy jäne osy baǧyttaǧy tüsındıru jūmystary söz bolǧan.
Basylymnyŋ qūrylymy «Basqarmadan» atty kırıspe bölımnen bastalyp, keiın saiasi, ekonomikalyq, jastar mäselelerıne arnalǧan bölımderge bölıngen. Sonymen qatar el ışındegı jäne şeteldegı jaǧdailar, türlı jaŋalyqtar qamtylǧan.
1932 jyldan 1941 jylǧa deiın jurnal «Kommunist» degen ataumen şyqty. Ūly Otan soǧysy jyldarynda basylymnyŋ jaryq köruıne üzılıs jasalyp, 1947 jyly qaitadan oqyrmanǧa jol tartty.
1952 jyly jurnaldyŋ atauy «Qazaqstan kommunisı» bolyp özgertıldı.
Qazaqstan täuelsızdık alǧannan keiın basylymnyŋ mazmūny men baǧyty da jaŋardy. 1991 jyldyŋ qyrküiegınen bastap jurnal «Aqiqat» atauymen jaryq körıp keledı.
Osylaişa, 1921 jyly «Qyzyl Qazaqstan» degen ataumen alǧaş jaryq körgen basylym biyl özınıŋ 105 jyldyq mereitoiyn atap otyr.
