BIR KEM DÚNIE...
Dúnıe bir kem degeni,
Shyndyqtyń jerde joqtyǵy.
Ashtyqtan kedeı talyqsyp,
Kekirgen baıdyń toqtyǵy.
Dúnıe bir kem degeni,
Ádildiktiń joqtyǵy.
Kún úshin júrgen kedeıge,
Baılardyń aıtqan boqtyǵy.
Dúnıe bir kem degeni,
Aqıqattyń joqtyǵy.
Elim dep týǵan estiden,
Essizderdiń kóptigi.
Dúnıe bir kem degeni,
Qundylyqtyń joqtyǵy
Dástúr men tildi umytqan,
Máńgúrtterdiń kóptigi.
Dúnıe bir kem degeni,
Qanaǵattyń joqtyǵy.
Hali múshkil qaradan,
Jemqorlardyń kóptigi.
Dúnıe bir kem degeni,
Bilimniń bizde joqtyǵy.
Jańalyq ashar ǵalymnan,
Zalynyń bıik shoqtyǵy.
Dúnıe bir kem degeni,
Aq pen qara egesi.
Jaqsynyń mingen atynan,
(Jaqsynyń ushqyr oıynan,)
Jamannyń ozǵan esegi.
(Jamannyń ozǵan esebi.)
Dúnıe bir kem degeni,
Jastyqtyń dáýren ótkeni,
Taıaǵyna súıenip,
Aıańdap qarttyq jetkeni.
Dúnıe bir kem degeni,
Meıirim ketken adamnan.
Qý dúnıe úshin inisi,
Aǵasyn alǵan jaǵadan.
Dúnıe bir kem degeni,
Ar-uıat ketken sanadan,
Tól-tilin bilmeı ólgenshe,
Baqılyq boldy qansha adam.
Dúnıe bir kem degeni,
ShERHANNYŃ tartqan,
Sher-muńy.
Azǵantaı qara qazaqtyń,
Qasiretiniń kóptigi.
QULYQ JOQ ZAMAN, QAITEIIN...
Baqyr bastyń erkindigin, qaıteıin...
Qasyqtaı tilim qansyrap jatsa.
Sanaýly baıdyń shalqyǵanyn, qaıteıin...
Qaraıǵan halyq nan surap jatsa.
Darhan dalamnyń keń ekenin, qaıteıin...
Týlaqtaı jer de buıyrmaı jatsa.
Elde joq baılyq kóp ekenin, qaıteıin...
Jegi qurt jemqor asyrmaı jatsa.
Alashymnyń arly ekenin, qaıteıin...
Qazaqty qazaq alalap jatsa.
Kórshilerdiń «uly» ekenin, qaıteıin...
Saıasatymen sabalap jatsa.
Júz otyz ulys kóp ekenin, qaıteıin...
Basyńa shyǵyp basynyp jatsa.
Kókelerdiń kóp ekenin, qaıteıin...
Kósegesin eldiń kógertpeı jatsa.
Depýtattardyń «Ant» bergenin, qaıteıin...
Óz Ana-tilin ejelep jatsa.
Ákimderdiń «ýádesin», qaıteıin...
Sharshaǵan Halyq nala bop jatsa.
Aqyndardyń «Adýynyn», qaıteıin...
Maqtaýmen ósip dara bop jatsa.
Ánshilerdiń «áýelegenin», qaıteıin...
Jarapazany jarnama bop jatsa.
Baǵylandardyń batyldyǵyn, qaıteıin...
«Kók qaǵazǵa» bas uryp jatsa.
Analardyń ashynǵanyn, qaıteıin...
«Talaby» ózine jala bop jatsa.
El sengen jastyń jalyndaǵanyn, qaıteıin...
«Ata-saltyńa» tas uryp jatsa.
Bala-baqshanyń bar ekenin, qaıteıin..
Baldyrǵan tili shala bop jatsa.
Aryz-armannyń kóp ekenin, qaıteıin...
Ádildik tappaı «qaza» bop jatsa.
Qazaqtyń qara uly ekenimdi, qaıteıin..
Halqymnyń muńy mazalap jatsa.
Ómirde myna tiri ekenimdi, qaıteıin...
Indetten Halqym qaza bop jatsa.
Qaıteıin endi qasiretińdi, qaıteıin..
Qasıetim qara bop jatsa.
Tań qalmańdar.
Osy jazǵanym,
Aınalyp kelip «pále» bop jatsa.
QAZAQ...
Qazaq meniń Halqym,
Qazaq meniń Qalpym.
Qazaq meniń Janym,
Qazaq meniń Qanym.
Qazaq meniń Babam,
Qazaq meniń Anam.
Qazaq meniń Sanam,
Qazaq meniń Saltym.
Qazaq meniń Zatym,
Qazaq meniń Tegim.
Qazaq meniń Tilim,
Qazaq meniń Dilim.
Qazaq meniń Ór rýhym,
Qazaq meniń Namysym.
Qazaq meniń Atym.
Qazaq meniń Seniń,
Qazaq degen Eliń!
EL ERTEŃI JASTARDA...
Táýelsizdik tuǵyrym,
Jelbirer máńgi kók týym.
Jalyndaǵan jastarym,
Tekti bop týǵan ul-qyzym,
Men senderge senemin.
Aqyl oıdyń kemeli,
Ar-ujdannyń semseri.
Estiden týǵan esti bop,
Men jastarǵa senemin.
Asyldyń qalǵan synyǵy,
Tulpardaı bekem tuıaǵy,
Qyrandaıyn qyraǵy.
Men jastarǵa senemin.
El men jerdiń taǵdyry,
Ana tildiń qal-muńy.
Qabyrǵańdy sógerdeı,
Ózińdi tiri kómerdeı,
Salt-sanańdy qor qylyp,
Ózin senen zor qylyp.
Erkekpen erkek tabysyp,
Áıelge áıel jabysyp,
Teke saqal din buzar.
Sanańdy ýlap salt buzyp,
Kelemiz átteń, sandy uryp.
El bıligi enjar ma?
Joq sanasy kemtar ma?
Jol berip qarap otyrar,
Shyǵatyn basqa jol barma?
Aınalaıyn jastarym,
Jáı otyndaı jarqyldap.
Juldyzdaıyn jamyrap,
Qarańǵy myna jurtyńa,
Kún bolyp týshy jarqyrap.
Bolashaq seniń qolyńda,
Biz senderge senemiz!
KIM BOLAMYZ?
Elimdi ez qorlasa,
Kim bolamyz?
Úńgirde ultyn súıgen,
Biz bolamyz.
Túk kórmeı qarańǵyda
Júrsek taǵy,
Sanasy jarqyraǵan,
Biz bolamyz.
Máńgúrtter aıtty eken dep,
Bir jaman sóz.
Jamanmen jaǵalassaq,
Kim bolamyz?
Erińdi er qoldasa,
El bolamyz.
Bereke birlik artyp,
Bir bolamyz.
Jaqsyny jaqsy desek,
Qadirlesek,
Alashym Qazaq bolmaı,
Kim bolamyz?!
Elińdi er qorǵasa,
El bolamyz.
Erleri elim deıtin,
Er bolamyz.
Qazaqty Qazaq súıse,
Jalǵyzym dep,
Qazaǵym «Alash» bolmaı,
Kim bolamyz?!
Namysyń bıik bolsa,
Tý bolamyz.
Rýhyń asqaqtasa,
Shyń bolamyz.
Ana tili,
Aman bolsa,
Táýelsiz máńgilikke,
El bolamyz!
OIaN QAZAQ...
Oıan qazaq!
Bir ǵasyr, uıqtap jatqan.
Men emespin, Mirjaqyp,
Qadap aıtqan.
Tirlik qaıda?
Yntymaq, birlik qaıda?
Tiri adamǵa jaramas,
Únsiz jatqan.
Oıan qazaq!
Tili qaıda anamnyń tildesetin.
«Qazaqpyn!» - dep jarqyrap,
Kún keshetin.
Til joq jerde, tirligiń
Tirlik emes,
«Úniń qaıda?» - únińmen,
Tildesetiń.
Rýh qaıda boıdaǵy,
Namys qaıda?
Uıat qaıda?
Ujdandy, oıatpaı ma?
Esinep, esti jımaı
Áli júrsiń,
Bul «Qazaqtyń» ǵasyrda
Tańy atpaı ma?!
Oıan Qazaq!
Boı túze,
Oıǵa batpa.
Bir Alla beredi - dep,
Qarap jatpa.
Óner úıren, bilim al,
Bilikti bol.
Namysyńdy kún úshin,
Nanǵa satpa.
Oıan Qazaq!
Ótkennen, sabaq alda.
Túsý kerek bolashaq,
Dara jolǵa.
Eliń jeriń turǵanda,
Ekelenbeı,
Kóshimizdi bastaıyq,
Sara jolǵa!!!
QAZAQ DEGEN, ALASh DEGEN BIZ EDIK...
Qazaq edik tarıhyn tasqa oıǵan,
Alash edik atoılap, atqa qonǵan.
Qazaq edik ór edik, órshil edik,
Bermep edik namysty, jatqa qoldan.
Qazaq edik aıbyndy asqar edik,
Alash edik ózgeden, asqaq edik.
Qazaq edik Bóri edik, erkin edik,
Alash edik Qyrandaı qyraǵy edik.
Qazaq edik tulpary, toptan ozǵan,
Alash edik aqyly, jurttan ozǵan.
Qazaq edik dám-tuzyn aqtaı bilgen,
Alash edik dástúrdi saqtaı bilgen.
Qazaq edik qamshysy daý qaıyraǵan,
Alash edik qylyshy jaý qaıyrǵan.
Qazaq edik kúsh alǵan taý-tasynan,
Alash edik ólmegen san ǵasyrdan.
Qazaq edik ańqyldaq, ańǵal edik,
Alash edik meırimdi, qormaly edik.
Qazaq edik jaýyna qatal edik,
Alash edik dostyqqa adal edik.
Qazaq edik eline qorǵan edik,
Alash edik saıaly orman edik.
Qazaq edik qurǵyr-aı qul da boldyq.
Alash edik «Arys» bop torda óldik.
Qaıran meniń «Jeltoqsan» bozdaqtarym,
Erligińmen Egemen elde boldyq.
Táýelsizbin qasterli tilim qaıda?!
Erlik jasar el deıtin erim qaıda?!
Men seneıin «jaqsy sóz jarym yrys».
Bolashaqqa seneıin, senim barma?!
KÓKEIDEGI BIR SURAQ?
Kókeıdegi bir suraq,
Salmaǵy aýyr zil suraq.
Etekte qaldy Qaıran til,
Tóbesinen quz qulap.
Tiri bop týǵan Alashym,
Tili joq átteń, myń suraq?!
Otyz jyl ótti tiliń joq,
Ózgeden sorly boldyq pa.
Esti bop týǵan el edik,
Ez bolyp qaıta týdyq pa.
Tórde otyrǵan uldardyń,
Sanasy átteń quldyqta!
NE DEISIŃ TAǴY NE DEISIŃ?...
Abaısyzda súrinseń,
Quladyń deısiń...
Qazaqtyń shertsem
Sher-muńyn,
Jyladyń deısiń...
Namysym tursa yshqynyp,
Týladyń deısiń...
Bir sátke únsiz joǵalsam,
Turmadyń deısiń...
Tilim úshin til qatsam,
Tilemshi deısiń...
Ultym úshin ún qatsam,
Uranshyl deısiń...
Joǵymdy tappaı surasam,
Suramshy deısiń...
Túrkiniń aıtsam birligin,
«Turanshyl» deısiń..
Shyndyqty aıtsam shyryldap,
Shýlattyń deısiń...
Allany alsam aýzyma,
«Quranshyl» deısiń...
«Arýaqty» aıtsam babalap,
Táńirshil deısiń....
Ózimmen ózim kúı keshsem,
Ózimshil deısiń...
Tegimdi aıtyp qaıteıin,
Rýshyl deısiń...
Ul bolyp jeseń ult qamyn,
Eee-eı.. ULTshyl deısiń.
Meni qoıshy eleýsiz
jáı pendemin.
Uly Abaı men Muqaǵalı,
Ne kórmedi!
Zarına ÁShIRBEK,
"Adyrna" ulttyq portaly
