"Basqa elderdıŋ mädenietı men bolmysyna elıkteu – būl qauıptı ürdıs. Ūlttyq tälım-tärbieden bastau alǧan otbasy qūndylyqtarynyŋ rölın küşeitu qajet". Būl pıkırdı QR Prezidentı janyndaǧy äielder ısı jäne otbasylyq-demografiialyq saiasat jönındegı ūlttyq komissiia müşesı Qaraqat Äbden Adyrna.kz portalyna bergen sūhbatynda aitty.
"Jahandanu jaǧdaiynda kün keşıp jatqan elımız özınıŋ töl tarihyn ūmytpai, mädenietın joǧaltyp almau kerek. Älem halyqtarynyŋ ozyq bılımı men jaŋa tehnologiiasy bızge ärine qajet. Bıraq basqa elderdıŋ mädenietı men bolmysyna elıkteu – būl qauıptı ürdıs. Sondyqtan qazırgı kezde ūlttyq tälım-tärbieden bastau alǧan otbasy qūndylyqtarynyŋ rölın küşeitu kerek. Ökınışke qarai, otbasy qūndylyqtary älsırep bara jatqany şyndyq. Otbasy instutynyŋ qūnsyzdanuy siiaqty älemdık tendensiia bızdıŋ elımızdı de ainalyp ötken joq. Mäselen, otbasylardyŋ ajyrasuy keiıngı jyldary örşıp tūrǧanyn aitpasaq ta belgılı. Sonyŋ kesırınen köp bala tolyq emes otbasylarda tärbielenıp jatyr. Qazır bız üşın būl üirenşıktı qūbylys bolyp kettı. Al şyn mänınde, onyŋ arǧy jaǧynda qanşama adamnyŋ taǧdyry jatyr. Äkesınıŋ nemese anasynyŋ meiırımın tolyq sezıne almaǧan qanşama bala ösıp keledı. Odan bölek, otbasyndaǧy zorlyq-zombylyq mäselesı de kürdelenıp kettı. Erlı-zaiyptylardyŋ arasyndaǧy tüsınıspeuşılıktıŋ saldarynan adam ölımı tırkeletın jaǧdailar da joq emes. Qatygez analardyŋ jaŋa tuǧan närestelerge körsetken zombylyǧy bır bölek äŋgıme. Baiqasaŋyzdar, osyndai qorqynyşty faktılerge boiymyz üirenıp bara jatqandai. Būnyŋ barlyǧy kezınde qazaq qoǧamyna, qazaqtyŋ ūlttyq sana-sezımıne, mädenietıne jat ūǧymdar edı ǧoi", - deidı Qaraqat Äbden.Onyŋ aituynşa, būl ruhani daǧdarystyŋ aiqyn körınısı.
"Mıne, sondyqtan bız ūlttyq qūndylyqtardy nasihattauǧa, ūlttyq tälım-tärbienı küşeituge bar küşımızdı saluymyz kerek. Halqymyzdyŋ danalyǧy, taǧylymy – tamyry tereŋde jatqan asyl mūra. «El bolamyn deseŋ, besigiŋdi tüze» demekşı, ūlttyq tälım-tärbie otbasynda qalyptasady. Balapan ūiada ne körse, ūşqanda sony ıledı. Demek, balanyŋ boiyna ūlttyq qūndylyqtardy sıŋıru otbasynan bastalady. Otbasynda körgen tärbie onyŋ bükıl ǧūmyryna azyq bolady. Bır quantarlyǧy, qazırgı kezde otbasylyq jäne ūlttyq qūndylyqtar jiı nasihattalatyn boldy. Memlekettık telearnalarda arnaiy baǧdarlamalar, kinotuyndylar, türlı jobalar jaryq körude. Jastar köz almaityn äleumettık jelılerde de paidaly kontentter az da bolsa şyǧyp jatyr. Bıraq ol da azdyq etedı. Qoǧamdyq ıstermen ainalysyp jürıp, men būqaranyŋ türlı ökılderımen qarym-qatynas jasaimyn. Olardyŋ bırşama bölıgı ūlttyq qūndylyqtardyŋ män-maŋyzyn tüsınbeidı, kosmopolittık baǧytty ūstanady. Demek, otbasy jäne ūlttyq qūndylyq mäselesın odan da joǧary deŋgeige köteru qajet. Otbasylyq qūndylyq degen ūǧymnyŋ özı memlekettık deŋgeidegı ideologiianyŋ basty bölıgıne ainalu qajet. Elımızde töl qūndylyqtarymyzdy nasihattaityn memlekettık baǧdarlamanyŋ, ūlttyq konsepsiianyŋ bolǧany dūrys. Sondai-aq būl baǧdarlama barlyq memlekettık organdar men vedomstvolardyŋ jūmysyna negız bolyp, qoǧamdy alǧa ılgerıletu kerek. Osyǧan köbırek köŋıl bölgen jön. Sebebı ruhy men salt-sanasy biık, ūlttyq qūndylyqtaryn därıptegen el ǧana öz kelbetın joǧaltpai, jetıstıkke jete alady, osyny ūmytpaiyq",- dep tüiındedı sözın Qaraqat Äbden.
"Adyrna" ūlttyq portaly
Ūqsas jaŋalyqtar
