14 جەلتوقسانعا قاراعان ءتۇنى اتىراۋ وبلىسىندا تسيكلون ءجۇرىپ، اۋا رايى كۇرت ناشارلاپ كەتتى. وبلىس اكىمىنىڭ توراعالىعىمەن بارلىق قىزمەتتەردىڭ جۇمىسىن ۇيلەستىرۋ بويىنشا جەدەل شتاب قۇرىلدى، دەپ حابارلايدى "ادىرنا".
"جەرگىلىكتى اتقارۋشى ورگاندار مەن اۋدانداردىڭ قىزمەتتەرى كۇشەيتىلگەن جۇمىس رەجيمىنە كوشتى، وڭىردەگى احۋالعا تاۋلىك بويى مونيتورينگ جۇرگىزىلۋدە", - دەپ حابارلادى اتىراۋ وبلىسىنىڭ اكىمدىگى.
اۋا رايىنىڭ كۇرت ناشارلاۋىنا بايلانىستى جول قاۋىپسىزدىگىن قامتاماسىز ەتۋ ماقساتىندا 2025 جىلى 14 جەلتوقساندا جۇك جانە قوعامدىق كولىكتەردىڭ قوزعالىسىنا ۋاقىتشا شەكتەۋ ەنگىزىلدى.
قازىرگى ۋاقىتتا كەلەسى رەسپۋبليكالىق ماڭىزى بار اۆتوجول ۋچاسكەلەرى جابىق:
- اتىراۋ – ورال تاس جولى;
- اتىراۋ – اقتوبە تاس جولى;
- اتىراۋ – دوسسور – بەينەۋ باعىتىنداعى اۆتوجول.
"بۇل شەكتەۋ بوران، قاتتى جەل جانە جولدىڭ كوكتايعاق بولۋى سالدارىنان كولىك قوزعالىسى ءۇشىن قاۋىپتى جاعدايلاردىڭ تۋىنداۋىنا بايلانىستى قابىلداندى. وسىعان وراي، اتىراۋ وبلىسىنىڭ پوليتسيا دەپارتامەنتى جۇرگىزۋشىلەر مەن جول قوزعالىسىنا قاتىسۋشىلاردى الىس جولعا شىقپاۋعا، جول قوزعالىسى ەرەجەلەرىن قاتاڭ ساقتاۋعا، سونداي-اق اۋا رايى جاقسارعانعا دەيىن ۋاقىتشا شەكتەۋلەرگە تۇسىنىستىكپەن قاراۋعا شاقىرادى", دەلىنگەن پوليتسيا حابارلاماسىندا.
قاتتى جەل سالدارىن جويۋ ءۇشىن "الاتاۋ جارىق" جشس-نىڭ اپاتتى جانە قايتا قالپىنا كەلتىرۋ بويىنشا 25 بريگاداسى جۇمىس ىستەۋدە. "اتىراۋ-جارىق" جشس ءباسپاسوز قىزمەتىنىڭ حابارلاۋىنشا، بەرەكە ىقشام اۋدانى، قارا وزەن اۋدانى، بەرەكە اۋىلىنىڭ ساياجاي ايماعى، سونداي-اق قالا ماڭىنداعى المالى اۋىلىنىڭ جەكەلەگەن كوشەلەرى جارىقسىز قالدى. بۇعان جەلدىڭ قاتتى ەكپىنىنە بايلانىستى ەلەكتر سىمدارىنىڭ ءۇزىلۋى تۇرتكى بولدى.
