بۇگىن اتىراۋ وبلىسىنىڭ قىلمىستىق ىستەر جونىندەگى اۋدانارالىق سوتىندا ءتورت ادامدى ءولتىردى دەگەن كۇدىكتى سۇلتان سارسەماليەۆتىڭ سوتى باستالدى. باستى كۇدىكتى – سۇلتان سارسەماليەۆ سۋديا مەن جۋرناليستەرگە قىلمىسقا نە ءۇشىن بارعانىن جانە سول ارەكەتى ءۇشىن ءولىم جازاسىنا دا دايىن ەكەنىن ايتتى، دەپ حابارلايدى "ادىرنا".
«جاساعان قىلمىسىما دا، وعان بەرەتىن كەز كەلەن اۋىر جازاعا دا دايىنمىن. ءولىم جازاسىنا دا، ءومىر بويى تۇرمە جازاسىنا دا دايىنمىن", - دەگەن ول قىلمىسقا بارۋ سەبەبىن تۇسىندىرۋگە تىرىسقان. ايتۋىنشا، "وزىنە جانە وتباسىنا جاسالعان ارەكەتتەرگە" ول وسىلاي جاۋاپ بەرگەن. سۇلتان سارسەماليەۆ ايەلى اقبايان مۇقانعاليەۆامەن ون جىل وتباسى بولعانىن جانە ەكەۋىنىڭ بەس بالاسى بار ەكەنىن ايتتى.
«ايەلىممەن ون جىل تاتۋ تۇردىق. ءاۋ باستا كەلىسپەۋشىلىك بولعاندا ورتامىزدا بەس بالا دۇنيەگە كەلمەس ەد. ايەلىمنىڭ ءۇي-ءىشى وتباسىما ارالاسىپ، ايەلمەن اجىراستىرعىسى كەلدى. سوندا دا بولىنگىمىز كەلمەي بىرگە تۇرا بەردىك. ال، ولار ء(وزى ولتىرگەن ءتورت ادام - رەد) قايتا-قايتا قوقان-لوققى كورسەتىپ، وتباسىما ارالاسۋىن توقتاتقان جوق. ايەلىمدى مەنەن تارتىپ الىپ، «ساعان دا جوق، اكە-شەشەڭە دە جوق» دەپ ءوز بالالارىممەن ءوزىمدى بوپسالاعانى – وسى قىلمىسقا يتەرمەلەدى. ادام توزگىسىز ار-نامىسىما تيەتىن اۋىر سوزدەر ايتتى. وسى ۋاقىتقا دەيىن وتباسىمدى ساقتاپ قالۋعا ارەكەتتەر جاسادىم. بالالارىمدى اكەسىنەن دە، اناسىنان دا ايىرعىم كەلگەن جوق. ەڭ سوڭعى ساتتە وتباسىمدى ساقتاپ قالامىن دەگەن جىگەرىم تاۋسىلىپ، ولاردىڭ ءىس-ارەكەتتەرى مەن سوزدەرى اقىلىمنان اجىراستىرىپ، جۇيكەمدى جۇقارتىپ، ادامي بولمىسىمدى كۇيرەتىپ جىبەردى. سوندىقتان، وسىنداي قىلمىسقا باردىم»، - دەيدى سوتتالۋشى.
ايتا كەتەيىك، ونىڭ ءىسىن اسا اۋىر قىلمىستاردى قارايتىن سۋديا زارەما حاميدۋللينا قارايدى.
كەلەسى سوت وتىرىسى 28–29 مامىرعا بەلگىلەندى.
