Bügın Atyrau oblysynyŋ qylmystyq ıster jönındegı audanaralyq sotynda tört adamdy öltırdı degen küdıktı Sūltan Särsemälievtıŋ soty bastaldy. Basty küdıktı – Sūltan Särsemäliev sudia men jurnalisterge qylmysqa ne üşın barǧanyn jäne sol äreketı üşın ölım jazasyna da daiyn ekenın aitty, dep habarlaidy "Adyrna".
«Jasaǧan qylmysyma da, oǧan beretın kez kelen auyr jazaǧa da daiynmyn. Ölım jazasyna da, ömır boiy türme jazasyna da daiynmyn", - degen ol qylmysqa baru sebebın tüsındıruge tyrysqan. Aituynşa, "özıne jäne otbasyna jasalǧan äreketterge" ol osylai jauap bergen. Sūltan Särsemäliev äielı Aqbaian Mūqanǧalievamen on jyl otbasy bolǧanyn jäne ekeuınıŋ bes balasy bar ekenın aitty.
«Äielımmen on jyl tatu tūrdyq. Äu basta kelıspeuşılık bolǧanda ortamyzda bes bala düniege kelmes ed. Äielımnıŋ üi-ışı otbasyma aralasyp, äielmen ajyrastyrǧysy keldı. Sonda da bölıngımız kelmei bırge tūra berdık. Al, olar (özı öltırgen tört adam - red) qaita-qaita qoqan-loqqy körsetıp, otbasyma aralasuyn toqtatqan joq. Äielımdı menen tartyp alyp, «saǧan da joq, äke-şeşeŋe de joq» dep öz balalarymmen özımdı bopsalaǧany – osy qylmysqa itermeledı. Adam tözgısız ar-namysyma tietın auyr sözder aitty. Osy uaqytqa deiın otbasymdy saqtap qaluǧa äreketter jasadym. Balalarymdy äkesınen de, anasynan da aiyrǧym kelgen joq. Eŋ soŋǧy sätte otbasymdy saqtap qalamyn degen jıgerım tausylyp, olardyŋ ıs-äreketterı men sözderı aqylymnan ajyrastyryp, jüikemdı jūqartyp, adami bolmysymdy küiretıp jıberdı. Sondyqtan, osyndai qylmysqa bardym», - deidı sottaluşy.
Aita keteiık, onyŋ ısın asa auyr qylmystardy qaraityn sudia Zarema Hamidullina qaraidy.
Kelesı sot otyrysy 28–29 mamyrǧa belgılendı.
