Moŋǧoliia astanasy Ūlan-Batyrdyŋ maŋynda aiu er adamdy öltırgen, dep habarlaidy “Adyrna” Vzgliad-qa sıltep.
Jyrtqyşty ızdeu jūmystary şamamen 20 saǧatqa sozylǧan.
Mälımetke säikes, aiudy ızdeuge tötenşe jaǧdailar qyzmetınıŋ mamandary men erıktılerden qūralǧan 47 adam qatysty. Izdestıru toby alty topqa bölınıp, tūzaqtar men jylu kamerasymen jabdyqtalǧan ūşqyşsyz ūşu apparattaryn paidalanǧan.
Nätijesınde jūmaǧa qaraǧan tünı şamamen alty jastaǧy atalyq aiu qolǧa tüstı. Januar qauıpsız jerge jetkızılgen. Mamandar onyŋ adamǧa şabuyl jasau oqiǧasyna qatysy bar-joǧyn anyqtaidy.
Oqiǧa 8 qazanǧa qaraǧan tünı Ūlan-Batyrdyŋ Baianzürh audanyndaǧy jaiylymdyq aumaqta bolǧan. Aldyn ala mälımet boiynşa, aiu qorşauy joq jazǧy üidı qiratyp, sol jerde bolǧan er adam men äielge şabuyl jasaǧan. Äiel auyr jaraqat alǧan.
Moŋǧoliia astanasynyŋ qorşaǧan ortany qorǧau departamentınıŋ mälımetınşe, jyl basynan berı Ūlan-Batyrdyŋ şet aimaqtarynda jyrtqyştardyŋ paida boluyna qatysty 24 habarlama tırkelgen. Al el boiynşa tūrǧyndar aiulardyŋ eldı mekenderge kıruıne bailanysty 754 ret habarlasqan. Mūndai jaǧdailardyŋ 80 paiyzynda aiular qonjyqtarymen bırge jürgen.
