Qara teŋızde Grekiianyŋ Skiros mūnai tankerı Novorossiisk maŋyndaǧy Kaspii qūbyr konsorsiumy (KQK) terminalynda mūnai tiegennen keiın şabuylǧa ūşyrady. Būl turaly Bloomberg 17 tamyzda anonimdı derekközge sılteme jasap jazdy, dep habarlaidy «Adyrna» tılşısı.
Agenttık būl oqiǧany «Reseidıŋ Ukrainaǧa qarsy soǧysy mūnai tasymalyna qalai äser etıp jatqanyn körsetetın eŋ soŋǧy mysal» dep atady. Mälımetke säikes, älemdık naryqqa jetkızıletın mūnaidyŋ şamamen 2 paiyzy KQK terminaly arqyly eksporttalady.
Derekközdıŋ aituynşa, şabuyl 16 tamyz künı bolǧan. KQK terminaly negızınen Qazaqstannan eksporttalatyn mūnaidy tieumen ainalysady. Alaida million barrelge deiın mūnai tasymaldauǧa qabılettı Skiros tankerınde reseilık mūnai bolǧan. Bloomberg mälımetınşe, KQK terminaly arqyly eksporttalatyn mūnaidyŋ 5-10 paiyzy Resei mūnaiyna tiesılı.
KQK terminalyndaǧy kemege jasalǧan būl şabuyl soŋǧy üş aptadaǧy alǧaşqy oqiǧa boldy. Şılde aiynda ŪŪA şabuyldarynyŋ qaitalanuy terminal jūmysyna kedergı keltırıp, älemdık naryqqa qazaqstandyq mūnai jetkızude maŋyzdy röl atqaratyn nysannyŋ qyzmetıne äser etken edı. Sonyŋ saldarynan Qazaqstandaǧy keibır ken oryndarynda mūnai öndıru kölemı qysqarǧan.
Şılde aiynyŋ soŋynda KQK qauıpsızdık qaterın azaitu jäne mūnai tögıluınen tuyndauy mümkın ekologiialyq zardaptardyŋ aldyn alu üşın jūmysyn uaqytşa toqtatuy mümkın ekenın de mälımdegen. Alaida keiın terminal qyzmetın jalǧastyru turaly şeşım qabyldandy.
Tankerdı basqaratyn grek kompaniiasynyŋ mälımetınşe, şabuyl saldarynan eşkım zardap şekken joq jäne qorşaǧan ortaǧa ziian kelmegen. Kompaniia äzırge qosymşa tüsınıkteme bergen joq.
