اقش-تا بەلگىلى گولليۆۋد رەجيسسەرى روب راينەر مەن ونىڭ جۇبايى ميشەل لوس-اندجەلەس قالاسىنداعى ءوز ۇيلەرىنەن ءولى كۇيىندە تابىلدى. بۇل تۋرالى ۆۆس جازدى، دەپ حابارلايدى “ادىرنا”.
قۇقىق قورعاۋ ورگاندارى وقيعانى ادام ءولتىرۋ دەرەگى رەتىندە تەرگەپ جاتىر.
پوليتسيا مەن ءورت ءسوندىرۋ قىزمەتى جەكسەنبى كۇنى تۇستەن كەيىن ەرلى-زايىپتىلاردىڭ برەنتۆۋد اۋدانىنداعى ۇيىنە شاقىرتۋ العان. قۇزىرلى ورگانداردىڭ مالىمەتىنشە، 78 جاستاعى ەر ادام مەن 68 جاستاعى ايەل سول جەردە قايتىس بولعان دەپ تانىلعان. الايدا مارقۇمداردىڭ اتى-ءجونى مەن ءولىمنىڭ ناقتى ءمان-جايى ازىرگە رەسمي تۇردە جاريالانعان جوق.
قازىرگى تاڭدا ەشكىم قاماۋعا الىنباعان، كۇدىكتىلەردى ىزدەۋ دە جۇرگىزىلمەي وتىر. تەرگەۋگە لوس-اندجەلەس پوليتسيا دەپارتامەنتىنىڭ كىسى ءولتىرۋ جانە توناۋ ىستەرى جونىندەگى دەتەكتيۆتەرى كىرىسكەن. پوليتسيا وكىلدەرى جاراقات سيپاتى مەن قارۋدىڭ قولدانىلعان-قولدانىلماعانى تۋرالى اقپارات بەرمەدى. ءولىم سەبەبىن قالانىڭ كورونەرلىك قىزمەتى انىقتايدى.
روب راينەر – «حانشايىم-قالىڭدىق»، «This Is Spinal Tap»، «گارري سالليمەن كەزدەسكەندە»، «ميزەري»، «بىرنەشە جاقسى جىگىت» سەكىلدى الەمدىك كينو كلاسسيكاسىنا اينالعان فيلمدەردىڭ رەجيسسەرى. ول سونداي-اق Castle Rock Entertainment پروديۋسەرلىك كومپانياسىنىڭ نەگىزىن قالاۋشىلاردىڭ ءبىرى.
كاليفورنيا گۋبەرناتورى گەۆين نيۋسوم رەجيسسەردىڭ قازاسىنا بايلانىستى كوڭىل ايتىپ، راينەردى «ۇلكەن جۇرەكتى، دانىشپان ادام» دەپ اتادى. ونىڭ ايتۋىنشا، رەجيسسەردىڭ شىعارماشىلىعى مەن قوعامدىق قىزمەتى امەريكالىق مادەنيەتكە تەرەڭ اسەر ەتتى.
تەرگەۋ جالعاسىپ جاتىر. قۇقىق قورعاۋ ورگاندارى الداعى ۋاقىتتا قوسىمشا اقپارات بەرىلەتىنىن مالىمدەدى.
