اقش كونگرەسى 2026 جىلعا ارنالعان قورعانىس بيۋدجەتى تۋرالى زاڭ جوباسىن ماقۇلدادى. قۇجاتتا اسكەري شىعىندار 901 ملرد دوللار كولەمىندە بەلگىلەنگەن. بۇل — رەكوردتىق كورسەتكىش، دەپ حابارلايدى «ادىرنا» ءتىلشىسى DW-گە سىلتەمە جاساپ.
سەناتتاعى داۋىس بەرۋ كەزىندە ۇلتتىق قورعانىس تۋرالى زاڭدى 77 سەناتور قولداپ, 20-سى قارسى داۋىس بەردى. وكىلدەر پالاتاسى بۇل قۇجاتتى وتكەن اپتادا-اق ماقۇلداعان. ەندى زاڭ كۇشىنە ەنۋى ءۇشىن اقش پرەزيدەنتى قول قويۋى ءتيىس. اق ءۇي دونالد ترامپتىڭ زاڭعا قول قويۋدى جوسپارلاپ وتىرعانىن مالىمدەدى. بىلتىر اقش-تىڭ اسكەري بيۋدجەتى 884 ملرد دوللاردى قۇراعان.
قۇجاتتا اسكەري قىزمەتكەرلەردىڭ جالاقىسىن 3,8%-عا ءوسىرۋ, اسكەري تەحنيكانى ساتىپ الۋ شارالارى قاراستىرىلعان.
سونىمەن قاتار زاڭ جوباسىندا ەۋروپاداعى قاۋىپسىزدىكتى نىعايتۋعا باعىتتالعان بىرقاتار تارماق بار. بۇل ترامپتىڭ اي باسىندا ۇسىنعان اقش-تىڭ ۇلتتىق قاۋىپسىزدىك ستراتەگياسىمەن قاراما-قايشى. جالپى العاندا 901 ملرد دوللار كولەمىندەگى قورعانىس بيۋدجەتى پرەزيدەنت سۇراعان سومادان اسىپ تۇسەدى. اق ءۇي باسشىسى 2026 جىلعا 892,6 ملرد دوللار ءبولۋدى وتىنگەن ەدى. ال سەنات باستاپقىدا شىعىنداردى 925 ملرد دوللارعا دەيىن ۇلعايتۋدى ۇسىنسا، وكىلدەر پالاتاسى ترامپ ۇسىنعان سوماعا جاقىن نۇسقانى قولداعان.
قۇجاتتا ۋكراينانى قولداۋعا دا ەرەكشە نازار اۋدارىلعان. زاڭ ۋكراينا قاۋىپسىزدىگىن قولداۋ باستاماسى اياسىندا 800 ملن دوللار ءبولۋدى كوزدەيدى. بۇل قارجى ۋكراينا قارۋلى كۇشتەرىنە ارنالعان قارۋ-جاراقتى امەريكالىق كومپانيالار ارقىلى ساتىپ الۋعا جۇمسالادى.
بۇدان بولەك، بالتىق ەلدەرىنىڭ — ەستونيا، لاتۆيا جانە ليتۆانىڭ قورعانىسىن نىعايتۋعا 175 ملن دوللار بولىنبەك. سونداي-اق زاڭ اقش قورعانىس مينيسترلىگىنىڭ ەۋروپاداعى امەريكالىق اسكەر سانىن 76 مىڭ ادامنان تومەندەۋىنە شەكتەۋ قويادى. ەۋروپاداعى امەريكالىق قولباسشىعا ناتو-نىڭ جوعارعى باس قولباسشىسى قىزمەتىنەن باس تارتۋعا تىيىم سالىنادى.
زاڭ جوباسىندا ترامپ ۇسىنعان اقش قورعانىس مينيسترلىگىن «سوعىس مينيسترلىگى» دەپ قايتا اتاۋ تۋرالى ۇسىنىس اتالمايدى. اقش اكىمشىلىگى بۇل اتاۋدى بەيرەسمي تۇردە قولدانىپ جۇرگەنىمەن جانە قورعانىس ءمينيسترى پيت حەگسەت ءوزىن «سوعىس ماسەلەلەرى جونىندەگى مەملەكەتتىك حاتشى» دەپ اتاعانىمەن، رەسمي تۇردە مۇنداي وزگەرىس كونگرەسس تاراپىنان بەكىتىلۋى ءتيىس.
