الماتى – بانگكوك باعىتىندا KC931 رەيسىن ورىنداعان Air Astana اۋە كومپانياسىنىڭ ۇشاعى 18 جەلتوقسان كۇنى ءۇندىستاننىڭ دەلي قالاسىنداعى اۋەجايعا قوندى، دەپ حابارلايدى "ادىرنا" ۇلتتىق پورتالى.
باعىتتىڭ وزگەرۋىنە تەحنيكالىق اقاۋ سەبەپ بولعان.
اۋە كومپانياسىنىڭ حابارلاۋىنشا، بورتتا 138 جولاۋشى بولعان. ۇشاق الماتىدان تۇنگى 01:00-دە ۇشىپ شىعىپ، دەلي اۋەجايىنا جەرگىلىكتى ۋاقىتپەن 05:51-دە قونعان. قونۋ شتاتتىق رەجيمدە وتكەن.
قازىرگى ۋاقىتتا جولاۋشىلارعا تاماق بەرىلىپ، ۋاقىتشا ۆيزالار راسىمدەلگەن. ولاردى قوناقۇيگە ورنالاستىرۋ ماسەلەسى شەشىلۋدە.
سونىمەن قاتار، Air Astana جولاۋشىلاردى بانگكوكقا جەتكىزۋ ءۇشىن رەزەرۆتىك ۇشاقتى دايىنداپ جاتىر.
ايتا كەتەيىك، بۇل سوڭعى ءبىر اپتانىڭ ىشىندە Air Astana اۋە كومپانياسىمەن بولعان ەكىنشى وقيعا. 17 جەلتوقسان كۇنى تاڭەرتەڭ الماتى – استانا باعىتىنداعى KC851 رەيسى اۋەگە كوتەرىلگەننەن كەيىن اۋەجايعا قايتا ورالىپ، شۇعىل قونۋ جاساعان. ەكيپاج سالوندا ءتۇتىن پايدا بولۋىنا بايلانىستى MAYDAY دابىلىن بەرگەن.
