مولدوۆا ازاماتىنىڭ قازاقستاندىق قۇقىق قورعاۋ ورگاندارىنىڭ جۇمىسىنا نارازىلىعىن بىلدىرگەن ۆيدەوسى الەۋمەتتىك جەلىلەردە قىزۋ تالقىلانعان سوڭ، پوليتسيا وقيعانىڭ ءمان-جايىن ءتۇسىندىردى، دەپ حابارلايدى "ادىرنا" ۇلتتىق پورتالى Tengri Travel-عا سىلتەپ
ۆيدەودا ءوزىن يگور دەپ تانىستىرعان ەر ادام الماتى اۋەجايىندا پوليتسيا مەن شەكارا قىزمەتىنىڭ تاراپىنان «سىبايلاس جەمقورلىق» پەن «زاڭسىز ارەكەتتەرگە» تاپ بولعانىن ايتىپ، شاعىمدانعان. ول سونداي-اق قۇجات راسىمدەۋ كەزىندە «ۆەلوسيپەدىن سىندىرىپ»، «پاسپورتى تاركىلەنگەنىن» مالىمدەگەن.
پوليتسيا دەپارتامەنتى بۇل مالىمەتتەردى تەكسەرىپ، وقيعانىڭ ناقتى ءمانىسىن انىقتادى.
«تەكسەرۋ بارىسىندا اتالعان ازاماتتىڭ تولقۇجاتىندا سايكەسسىزدىك بار ەكەنى – كەيبىر بەتتەردىڭ جوقتىعى انىقتالدى. سول سەبەپتى ول قوسىمشا تەكسەرۋگە جىبەرىلگەن. فاكت راستالدى»، – دەلىنگەن پوليتسيانىڭ رەسمي حابارلاماسىندا.
ۆەدومستۆو وكىلدەرى باسقا ايىپتاۋلار بويىنشا دا تەكسەرۋ جۇرگىزىلگەنىن ايتتى.
"پوليتسيا قىزمەتكەرلەرىمەن ەشقانداي جانجال بولعان جوق. ۆەلوسيپەدتىڭ سىنۋى جانە وزگە دە مالىمەتتەر شىندىققا سايكەس كەلمەيدى", – دەپ مالىمدەدى دەپارتامەنت.
پوليتسيا يگور ەسىمدى ازاماتپەن پروفيلاكتيكالىق اڭگىمە وتكىزىپ، زاڭ تالاپتارىن تۇسىندىرگەن.
«كەلەڭسىز جاعداي تولىق ءتۇسىندىرىلىپ، شەتەلدىك ازامات پوليتسيا ارەكەتتەرىنىڭ زاڭدى ەكەنىن مويىندادى»، – دەدى ۆەدومستۆودا.
كەيىن دەپارتامەنت شەتەلدىك ازاماتتىڭ ءوز قاتىسۋىمەن تۇسىرىلگەن جاڭا ۆيدەونى جاريالادى.
«مەن الماتى اۋەجايىندامىن. شەكارا قىزمەتىمەن بولعان تۇسىنبەۋشىلىك شەشىلدى. پوليتسيا ماعان كومەكتەستى، ءبارى جاقسى. قۇقىق قورعاۋ ورگاندارىنا ەشقانداي شاعىمىم جوق»، – دەپ مالىمدەدى.
پوليتسيانىڭ مالىمەتىنشە، مولدوۆا ازاماتى قازاقستاننان ەش كەدەرگىسىز ءوز ساپارىن جالعاستىرعان.
