الماتى قالاسىندا مەملەكەت باسشىسىنىڭ 2,5 ميلليون اعاش ەگۋ جونىندەگى تاپسىرماسىن ورىنداۋ باعىتىنداعى جۇمىستار جۇيەلى تۇردە جالعاسىپ كەلەدى. بۇل تۋرالى الماتى قالاسىنىڭ اكىمى دارحان ساتىبالدى قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا بۇقارالىق اقپارات قۇرالدارى وكىلدەرىنىڭ ساۋالىنا جاۋاپ بەرۋ كەزىندە مالىمدەدى.
قالا اكىمىنىڭ ايتۋىنشا، الماتىنى كوگالداندىرۋعا باعىتتالعان كەشەندى باعدارلاما ۇزاق مەرزىمگە جوسپارلانعان جانە 2030 جىلعا دەيىن كەزەڭ-كەزەڭىمەن جۇزەگە اسىرىلادى. بۇگىنگى تاڭدا اتالعان باعدارلامانىڭ شەڭبەرىندە جوسپارلانعان جۇمىستاردىڭ شامامەن 50 پايىزى ورىندالعان. سونىڭ ناتيجەسىندە قالا اۋماعىندا جاسىل جەلەك كولەمى بىرتىندەپ ارتىپ، ەكولوگيالىق جاعدايدى جاقسارتۋعا باعىتتالعان ناقتى قادامدار جاسالۋدا.
الداعى كەزەڭدەردە كوگالداندىرۋ جۇمىستارى ودان ءارى جالعاسىپ، قالا اۋماعىندا قوسىمشا شامامەن 1,3 ميلليون اعاش پەن بۇتا ەگۋ جوسپارلانىپ وتىر. بۇل باستاما مەگاپوليستەگى اۋا ساپاسىن جاقسارتۋعا، شاڭ-توزاڭ مەن زياندى شىعارىندىلاردىڭ دەڭگەيىن تومەندەتۋگە، سونداي-اق تۇرعىندار ءۇشىن قولايلى ءارى جايلى قالالىق ورتا قالىپتاستىرۋعا باعىتتالعان.
سونىمەن قاتار الماتى قالاسىنىڭ اكىمى قالاداعى كوگالداندىرۋ ساياساتىنا قاتىستى تاسىلدەر قايتا قارالىپ جاتقانىن اتاپ ءوتتى. اتاپ ايتقاندا، ەندىگى كەزەكتە تەك ەگىلەتىن اعاشتاردىڭ سانىنا عانا ەمەس، ولاردىڭ ساپاسىنا، بەيىمدەلۋ دەڭگەيىنە جانە ۇزاق مەرزىمدى تۇراقتىلىعىنا ەرەكشە كوڭىل بولىنەتىن بولادى. وسى ماقساتتا وتىرعىزۋ تەحنولوگيالارى جاڭارتىلىپ، ءىرى كولەمدى، ياعني تەز قالىپتاساتىن جانە كوزگە كورنەكى اسەر بەرەتىن اعاش تۇرلەرىن پايدالانۋ تاجىريبەسى ەنگىزىلۋدە.
دارحان ساتىبالدىنىڭ ايتۋىنشا، بۇل جۇمىستار سالالىق ماماندار مەن ساراپشىلاردىڭ قاتىسۋىمەن جۇزەگە اسىرىلىپ جاتىر. قالالىق ەكولوگيانىڭ ەرەكشەلىكتەرى مەن جوعارى كولىك جۇكتەمەسى ەسكەرىلە وتىرىپ، الماتى جاعدايىنا بارىنشا بەيىمدەلەتىن اعاش تۇرلەرى مۇقيات ىرىكتەلۋدە. قالا باسشىسى الداعى ۋاقىتتا كوگالداندىرۋ سالاسىندا ساندىق كورسەتكىشتەردەن گورى جاسىل جەلەكتىڭ ساپاسى، توزىمدىلىگى جانە ۇزاق مەرزىمدى تيىمدىلىگى باستى باسىمدىققا اينالاتىنىن اتاپ ءوتتى.
الماتى قالاسىندا «زاڭ مەن ءتارتىپ» اكتسياسى اياسىندا ادام قۇقىقتارى بويىنشا ءتۇسىندىرۋ ءدارىسى ءوتتى
