الماتى وبلىسىندا «تازا قازاقستان» باعدارلاماسى اياسىندا قوعامدىق ورىنداردىڭ تازالىعى مەن ءتارتىبىن ساقتاۋعا باعىتتالعان شارالار كۇشەيتىلدى. باقىلاۋ رەيدتەر بارىسىندا عانا ەمەس، الەۋمەتتىك جەلىلەردى مونيتورينگتەۋ ارقىلى دا جۇرگىزىلۋدە. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە الماتى وبلىستىق قوعامدىق قاۋىپسىزدىك باسقارماسى باستىعىنىڭ ورىنباسارى، پوليتسيا پولكوۆنيگى راحىم تولوكۇلوۆ مالىمدەدى.
جىل باسىنان بەرى وڭىردە 10 مىڭنان استام اكىمشىلىك قۇقىق بۇزۋشىلىق انىقتالعان. ونىڭ ىشىندە 239 دەرەك قوعامدىق ورىنداردى لاستاۋمەن بايلانىستى بولسا، 9 878 جاعداي اۋماقتاردى اباتتاندىرۋ قاعيدالارىن بۇزۋ بويىنشا تىركەلگەن. پوليتسيا مالىمەتىنشە، قۇقىق بۇزۋشىلارعا 10 ملن تەڭگەدەن استام ايىپپۇل سالىنعان، ونىڭ شامامەن 6 ملن تەڭگەسى وندىرىلگەن.
«تازا قازاقستان» باعدارلاماسى ىسكە قوسىلعان ساتتەن يۋاستاپ، ياعني 2024 جىلدىڭ ءساۋىر ايىنان بەرى وبلىستا قوعامدىق ورىنداردى لاستاۋعا قاتىستى 4 866 قۇقىق بۇزۋشىلىق جانە اباتتاندىرۋ قاعيدالارىن بۇزۋدىڭ 46 300 فاكتىسى تىركەلگەن. ەكى جىل ىشىندە سالىنعان ايىپپۇلداردىڭ جالپى سوماسى 169 ملن تەڭگەدەن استى.
«قازىرگى تاڭدا جۇمىس رەيدتەر ارقىلى عانا جۇرگىزىلمەيدى. ءبىز اكىمدىكپەن جانە قوعام بەلسەندىلەرىمەن بىرلەسىپ، الەۋمەتتىك جەلىلەرگە كۇن سايىن مونيتورينگ جۇرگىزەمىز. زاڭسىز قوقىس توگۋ دەرەكتەرىن انىقتاپ، جەدەل ارەكەت ەتۋدەمىز. جىل باسىنان بەرى ينتەرنەت مونيتورينگى ارقىلى 24 رۇقساتسىز قوقىس ءۇيىندىسى انىقتالدى. جالپى باعدارلاما باستالعالى تەك الەۋمەتتىك جەلىلەر ارقىلى 82 زاڭسىز قوقىس توگۋ ورنى انىقتالىپ، ونىڭ 65-ءى جويىلدى. انىقتالعان بارلىق دەرەكتەر بويىنشا ماتەريالدار ءتيىستى شارا قابىلداۋ ءۇشىن ەكولوگيا دەپارتامەنتىنە دە جولدانادى»، – دەدى الماتى وبلىستىق قوعامدىق قاۋىپسىزدىك باسقارماسى باستىعىنىڭ ورىنباسارى راحىم تولوكۇلوۆ.
باقىلاۋدى كۇشەيتۋ ماقساتىندا وڭىردە پوليتسيا، تابيعاتتى قورعاۋ ورگاندارى، ەرىكتىلەر، قوعام بەلسەندىلەرى، بيۋدجەتتىك ۇيىمدار مەن بيزنەس وكىلدەرىنىڭ قاتىسۋىمەن 30 ءموبيلدى توپ قۇرىلعان. رەيدتىك ءىس-شارالارعا 338 ادام تارتىلعان، ونىڭ 313-ءى – پوليتسيا قىزمەتكەرلەرى.
ايتە كەتەيىك، جىل باسىنان بەرى 350 رەيد وتكىزىلدى. زاڭ تالاپتارىن بۇزعانداردى انىقتاۋ جانە رۇقساتسىز قوقىس ۇيىندىلەرىن جويۋ جۇمىستارى كۇشەيتىلگەن رەجيمدە جالعاسىن تابادى.
