الماتى قالاسى ادىلەت دەپارتامەنتىندە گەرمانيا فەدەراتيۆتىك رەسپۋبليكاسىنىڭ بۋندەستاگى جانىنداعى قۇقىقتىق ماسەلەلەر جانە تۇتىنۋشىلاردىڭ قۇقىقتارىن قورعاۋ كوميتەتىنىڭ وكىلدەرىمەن رەسمي كەزدەسۋ ءوتتى. حالىقارالىق دەڭگەيدە ۇيىمداستىرىلعان بۇل ءىس-شاراعا الماتى قالاسى ادىلەت دەپارتامەنتىنىڭ باسشىسى بالايم تۋعانباەۆنا كەسەباەۆا، سونداي-اق دەپارتامەنتتىڭ قۇرىلىمدىق بولىمشەلەرىنىڭ جەتەكشىلەرى مەن جاۋاپتى قىزمەتكەرلەرى قاتىستى.
كەزدەسۋ بارىسىندا تاراپتار قۇقىقتىق جۇيەنى جاڭعىرتۋعا باعىتتالعان كونستيتۋتسيالىق رەفورمالاردىڭ جۇزەگە اسىرىلۋى، مەملەكەتتىك باسقارۋ سالاسىنداعى تسيفرلاندىرۋ ۇدەرىسىنىڭ بارىسى، سونداي-اق سىبايلاس جەمقورلىقتىڭ الدىن الۋ مەن وعان قارسى ءىس-قيمىل جاساۋ ماسەلەلەرى بويىنشا وزەكتى تاقىرىپتاردى كەڭىنەن تالقىلادى. قازاقستان تاراپىنان مەملەكەتتىك قىزمەتتەردىڭ ساپاسىن ارتتىرۋ، ازاماتتارعا كورسەتىلەتىن قىزمەتتەردىڭ قولجەتىمدىلىگى مەن اشىقتىعىن قامتاماسىز ەتۋ ماقساتىندا زاماناۋي تسيفرلىق تەحنولوگيالاردى ەنگىزۋ تاجىريبەسى جان-جاقتى تانىستىرىلدى.
ءوز كەزەگىندە گەرمانيا دەلەگاتسياسىنىڭ وكىلدەرى قۇقىقتىق رەتتەۋ سالاسىنداعى ۇلتتىق تاجىريبەلەرىمەن ءبولىسىپ، تۇتىنۋشىلاردىڭ قۇقىقتارىن قورعاۋ جانە سىبايلاس جەمقورلىققا قارسى ساياساتتى ىسكە اسىرۋداعى ءتيىمدى تەتىكتەر مەن وزىق تاجىريبەلەردى ۇسىندى. سونىمەن قاتار، قۇقىق ۇستەمدىگىن قامتاماسىز ەتۋ جانە قوعامداعى سەنىمدى نىعايتۋ جولىنداعى جۇيەلى جۇمىستاردىڭ ماڭىزدىلىعى اتاپ ءوتىلدى.
مۇنداي حالىقارالىق ىنتىماقتاستىق پەن كاسىبي ديالوگ ادىلەت سالاسىنا زاماناۋي ءارى ءتيىمدى شەشىمدەردى ەنگىزۋگە، ەكى ەل اراسىنداعى تاجىريبە الماسۋدى نىعايتۋعا، سونداي-اق قوعامنىڭ قۇقىقتىق مادەنيەتىن دامىتۋعا جانە زاڭعا دەگەن قۇرمەتتى ارتتىرۋعا كەڭ مۇمكىندىك بەرەدى.
