قازاقستاننىڭ 10 تەاترى ALMATY THEATRE FEST فەستيۆالىندە قويىلىمدارىن ۇسىندى

334
Adyrna.kz Telegram
https://www.adyrna.kz/storage/uploads/dt5RiVptKXbA7SXd6cfF1loQ9Vr2OSTTo4ZvvP5r.jpg

الماتىدا «الاتاۋ» ءداستۇرلى ونەر تەاترىنىڭ 10 جىلدىعىنا ارنالعان ALMATY THEATRE FEST رەسپۋبليكالىق تەاتر فەستيۆالى مارەسىنە جەتتى.

15-20 قاراشا ارالىعىندا التى كۇن بويى ەلىمىزدىڭ ءار وڭىرىنەن كەلگەن كاسىبي تەاتر ۇجىمدارى ءبىر ساحنادا باس قوسىپ، كورەرمەنگە ءتۇرلى جانر مەن باعىتتاعى قويىلىم ۇسىندى.

الماتى اكىمدىگىنىڭ قولداۋىمەن وتكەن فەستيۆالگە 10 تەاتر ۇجىمى قاتىستى. باعدارلاماعا ع. مۇسىرەپوۆ، س. سەيفۋللين، ن. بەكەجانوۆ، ب. ريموۆا، ح. بوكەەۆا، س. قوجامقۇلوۆ اتىنداعى تەاترلاردىڭ، مەملەكەتتىك اكادەميالىق قۋىرشاق تەاترىنىڭ، ا. مامبەتوۆ اتىنداعى مەملەكەتتىك دراما جانە كومەديا تەاترىنىڭ، ءاسانالى ءاشىموۆ تەاترىنىڭ جانە Silk Stage شىعارماشىلىق كەڭىستىگىنىڭ قويىلىمدارى ەندى.

كورەرمەن نازارىنا «ۆويتسەك»، «سايگۇلىك»، «She is Aiel»، «جابايى الما»، «نايزاعاي»، «قورعانسىز»، «توميريس»، «ورتەكە» جانە «رومەو مەن دجۋلەتتا» سپەكتاكلدەرى ۇسىنىلدى. بۇل قويىلىمدار قازاقستاننىڭ قازىرگى تەاتر ونەرىندەگى جانرلىق الۋاندىلىقتى، كوركەمدىك ىزدەنىستەر مەن شىعارماشىلىق تاجىريبەلەردى تانىتتى.

فەستيۆال اياسىندا كاسىبي پىكىر الماسۋعا دا ەرەكشە ءمان بەرىلدى. ءار قويىلىمنان كەيىن تەاترتانۋشىلار، سىنشىلار، رەجيسسەرلەر مەن اكتەرلەردىڭ قاتىسۋىمەن تالقىلاۋلار ءوتتى. وندا رەجيسسەرلىك شەشىمدەر، قويىلىمنىڭ كوركەمدىك تۇجىرىمداماسى مەن اكتەرلىك شەبەرلىك سارالانىپ، قاتىسۋشىلار ءوزارا پىكىر جانە تاجىريبە الماستى.

سونىمەن قاتار ء«داستۇرلى ونەر جانە زاماناۋي تەاتر كەڭىستىگى» تاقىرىبىندا رەسپۋبليكالىق دوڭگەلەك ۇستەل ۇيىمداستىرىلدى. وندا ۇلتتىق تەاتر ونەرىن دامىتۋ، ءداستۇردى ساقتاۋ جانە ونى قازىرگى ساحنا كەڭىستىگىمەن ۇشتاستىرۋ ماسەلەلەرى تالقىلاندى. سالا ماماندارى ۇلتتىق تەاتردىڭ بۇگىنگى ۇردىستەرى مەن دامۋ مۇمكىندىكتەرىن، شىعارماشىلىق ىزدەنىستىڭ جاڭا باعىتتارىن ورتاعا سالدى.

فەستيۆال قورىتىندىسى بويىنشا 10 تەاتر ۇجىمىنىڭ بارلىعىنا ارنايى مۇسىنشە، ديپلوم جانە 1 ملن تەڭگەلىك سەرتيفيكات تابىستالدى. بۇدان بولەك، ساراپشىلار القاسى تەاتر ونەرىنىڭ وكىلدەرىنە ارنايى ماراپاتتار بەردى. «ساحنا ونەرىندەگى كاسىبي شەبەرلىگى ءۇشىن» نوميناتسياسىمەن قازاقستاننىڭ حالىق ارتيستەرى ليديا كادەنوۆا مەن كەڭەس جۇمابەكوۆ ماراپاتتالدى.

سونداي-اق قازاقستاندىق تەاتر ونەرىنىڭ كورنەكتى وكىلدەرى سەركە قوجامقۇلوۆ، ءبايدىلدا قالتاەۆ، ايشا ابدۋللينا، راحيا قويشىباەۆا، حابيبا ەلەبەكوۆا، كاۋكەن كەنجەتاەۆ، بيكەن ريموۆا، ماكىل قۇلانباەۆ، زامزاگۇل ءشارىپوۆا، ىدىرىس نوعايباەۆ، فاريدا ءشارىپوۆا جانە التىنبەك كەنجەكوۆ اتىنداعى ارنايى ماراپاتتار تابىستالدى.

ALMATY THEATRE FEST ەلىمىزدىڭ تەاتر ۇجىمدارى اراسىنداعى شىعارماشىلىق تاجىريبە الماسۋعا، كاسىبي بايلانىستى نىعايتۋعا جانە مادەني ىنتىماقتاستىقتى دامىتۋعا جول اشتى. فەستيۆال قازاقستاندىق ساحنا ونەرىنىڭ ءداستۇرى مەن زاماناۋي ۇردىستەرىن توعىستىرعان ماڭىزدى مادەني الاڭعا اينالدى.

پىكىرلەر