باتىس قازاقستان وبلىسىندا ەنەرگەتيكا سالاسىنىڭ قىزمەتكەرلەرى كاسىبي مەرەكەلەرىن سالتاناتتى تۇردە اتاپ ءوتتى. شاراعا سالا ماماندارى، ارداگەرلەر مەن وبلىس باسشىلىعى قاتىستى.
سالتاناتتى جيىندا وبلىس اكىمى ناريمان تورەعاليەۆ مەملەكەت باسشىسىنىڭ ەنەرگەتيكا سالاسىنىڭ ماڭىزدىلىعى تۋرالى ايتقان ءسوزىن كەلتىرىپ، بۇل سالانىڭ ەل دامۋى ءۇشىن ستراتەگيالىق ءرول اتقاراتىنىن اتاپ ءوتتى.
— ەنەرگەتيكا – ەل ەكونوميكاسىنىڭ نەگىزگى تىرەكتەرىنىڭ ءبىرى. سوڭعى جىلدارى وڭىرىمىزدە وسى باعىتتا بىرقاتار اۋقىمدى جۇمىستار اتقارىلدى. ماسەلەن، سوڭعى ءۇش جىلدا جالپى قۇنى 13 ملرد تەڭگە بولاتىن 12 جوبا جۇزەگە اسىرىلىپ، 6 مىڭ شاقىرىمعا جۋىق توزعان ەلەكتر جەلىلەرى جاڭارتىلدى. ەكى جاڭا قوسالقى ستانتسيا مەن وندىرىستىك-جوندەۋ بازالارى سالىندى. سونىڭ ناتيجەسىندە ەلەكتر جەلىلەرىنىڭ توزۋ دەڭگەيى 82%-دان 75,4%-عا دەيىن تومەندەدى، – دەپ ايماق باسشىسى سالانىڭ سوڭعى جىلدارى جەتكەن جەتىستىكتەرىنە توقتالدى.
وڭىردە ەنەرگيا تيىمدىلىگىن ارتتىرۋداعى ماڭىزدى قادامداردىڭ ءبىرى – سوڭعى ون جىل بويى توقتاپ تۇرعان ورال جىلۋ-ەلەكتر ورتالىعىنىڭ №1 تۋربواگرەگاتىن جاڭعىرتۋ بولدى. سونىڭ ارقاسىندا ستانتسيانىڭ قۋاتى 12,5 مۆت-قا ارتىپ، جالپى قۋاتى 58 مۆت-قا جەتتى. سونىمەن قاتار، قالانى ەلەكتر ەنەرگياسىمەن تۇراقتى قامتاماسىز ەتۋ ماقساتىندا HITACHI تۋربيناسىنا كۇردەلى جوندەۋ جۇمىستارى جۇرگىزىلۋدە.
وبلىستا سۋ، كارىز جانە جىلۋ جۇيەلەرىن جاڭارتۋ جۇمىستارى كەزەڭ-كەزەڭىمەن جۇزەگە اسىرىلۋدىڭ ناتيجەسىندە 2023 جىلدان بەرى ورال جەراستى سۋ كوزىندە 6 جاڭا ۇڭعىما بۇرعىلانىپ، سۋ ءوندىرۋ كولەمى تاۋلىگىنە 40 مىڭ تەكشە مەترگە دەيىن ارتتى. 2025 جىلى ديامەترى 1000 مم سۋ قۇبىرى مەن جەراستى سۋ كوزدەرىن رەكونسترۋكتسيالاۋ باستالدى.
كارىز جۇيەلەرى بويىنشا 2023 جىلدان بەرى 4 ءىرى نىسان ىسكە قوسىلىپ، پايدالانۋ مەرزىمى 60 جىلدان اسقان جانە بۇعان دەيىن رەكونسترۋكتسيا جۇرگىزىلمەگەن 4 ءىرى كارىزدىك سورعى ستانتسيالارىنىڭ جاڭعىرتىلۋىنىڭ ناتيجەسىندە 320 مىڭ تۇرعىن سەنىمدى كارىز جۇيەسىمەن قامتىلدى. تاعى 2 ستانتسيانىڭ رەكونسترۋكتسياسى اياقتالىپ، 90 مىڭنان استام ابونەنت تۇراقتى سۋ بۇرۋ جۇيەسىنە قوسىلادى.
ورال جىلۋ ەلەكتر ورتالىعىندا گراديرنيا تولىق اۋىستىرىلىپ، جايىق وزەنىنەن الىناتىن تەحنيكالىق سۋ كولەمى جىلىنا 4 ملن تەكشە مەترگە قىسقاردى. «ەنەرگەتيكا جانە كوممۋنالدىق سەكتوردى جاڭعىرتۋ» ۇلتتىق جوباسى اياسىندا 6 اۋدان مەن ورال قالاسىنىڭ 44 ەلدى مەكەنىندە اۋە ەلەكتر جەلىلەرى، سونداي-اق جىلۋ جانە كارىز جەلىلەرى جاڭارتىلىپ، 9 ءىرى جوبا ىسكە اسىرىلا باستادى.
2029 جىلعا دەيىن ينجەنەرلىك جەلىلەردى جاڭعىرتۋ بويىنشا 2023 جىلدان بەرى 28 اۋىلعا گاز تارتىلىپ، 3,7 مىڭ تۇرعىن العاش رەت گازعا قول جەتكىزدى، 60 الەۋمەتتىك نىسان قوسىلدى. وبلىستىڭ گازبەن قامتىلۋى 99,8%-عا جەتتى. سونىمەن قاتار، 65 ەلدى مەكەندى قامتيتىن «روستوشي–تايپاق» گاز قۇبىرىن رەكونسترۋكتسيالاۋ جوباسى ۇكىمەت تاراپىنان قولداۋ تاۋىپ، بيىل باستالدى.
-مەملەكەت باسشىسى ايقىنداپ بەرگەندەي، كۇردەلى جاعدايدا ينۆەستيتسيا تارتۋ – باستى مىندەتتەردىڭ ءبىرى جانە بۇل جاڭا تاسىلدەردى تالاپ ەتەدى. وسى باعىتتا وبلىسقا، اسىرەسە ەنەرگەتيكا سالاسىنا ينۆەستيتسيا تارتۋ جۇمىستارى بەلسەندى جۇرگىزىلۋدە. شەتەلدىك ءىرى كومپانيالارمەن بىرقاتار كەلىسىمدەرگە قول جەتكىزىلدى. اتاپ ايتقاندا، جانىبەك اۋدانىنىڭ ونەگە اۋىلىندا قۋاتى 4,9 مۆت قۇرايتىن كۇن ەلەكتر ستانتسياسىن، ورال قالاسىنىڭ اۋماعىندا 50 مۆت قۇرايتىن جەل ەلەكتر ستانتسياسىن، تەرەكتى اۋدانىنىڭ پويما اۋىلىندا 20 مۆت قۇرايتىن گازپورشەندى ەلەكتر ستانتسيالارىن سالۋ جوسپارلانۋدا جانە بۇل باعىتتاعى جۇمىستار باستالىپ تا كەتتى،-دەدى ءوڭىر باسشىسى ناريمان تورەعاليەۆ.
سونىمەن قاتار، ينۆەستورلار ەسەبىنەن ورال قالاسىنىڭ جىلۋ ەلەكتر ورتالىعىن جاڭعىرتىپ، قۋاتىن ارتتىرۋ كوزدەلىپ وتىر.
شارا بارىسىندا سالانىڭ دامۋىنا ەلەۋلى ۇلەس قوسقان سالا ماماندارىنا «ەلەكتر ەنەرگەتيكاسى سالاسىنا قوسقان ۇلەسى ءۇشىن» مەدالى، «ەڭبەك سىڭىرگەن ەنەرگەتيك» جانە «قۇرمەتتى ەنەرگەتيك» توسبەلگىلەرى، سونداي-اق قر ەنەرگەتيكا ءمينيسترىنىڭ قۇرمەت گراموتاسى مەن وبلىس اكىمىنىڭ العىس حاتتارى تابىستالدى
