ورال قالاسىندا اسكەري قايراتكەر، ەرجۇرەك قولباسشى، كەڭەس وداعىنىڭ باتىرى، حالىق قاھارمانى باۋىرجان مومىشۇلىنىڭ تۋعانىنا 115 جىل تولۋىنا وراي «باتىر باۋىرجان: بولمىس پەن بيىكتىك» اتتى پاتريوتتىق فورۋم ءوتىپ جاتىر. ءبىر ەرەكشەلىگى – فورۋمعا وبلىس دەڭگەيىندە ءوز سالاسىندا تانىلىپ جۇرگەن باۋىرجان ەسىمدى 115 ادام شاقىرىلعان.
فورۋم «AMANAT» پارتياسى بقو فيليالىنىڭ «زاڭ مەن ءتارتىپ» تۇجىرىمداماسى اياسىندا ۇيىمداستىرىلىپ، وعان زيالى قاۋىم وكىلدەرى، ارداگەرلەر، اسكەري قىزمەتشىلەر، قۇقىق قورعاۋ ورگاندارىنىڭ وكىلدەرى، جاستار مەن ستۋدەنتتەر قاتىسۋدا.
شارا بارىسىندا تەاترلاندىرىلعان كورىنىستەر ارقىلى باۋىرجان مومىشۇلىنىڭ بالالىق شاعى، وتباسىلىق تاربيەسى، مايدانداعى ەرلىگى مەن ەلگە قالدىرعان وسيەتى كوركەم تۇردە ساحنالاندى. باتىردىڭ تەك جاۋىنگەر ەمەس، قالامگەر، اعارتۋشى رەتىندەگى بولمىسى كەڭىنەن ناسيحاتتالدى.
- بۇگىن باتىر بابامىز باۋىرجان مومىشۇلىنىڭ تۋعانىنا 115 جىل تولۋىنا وراي ورال قالاسىندا ۇلكەن پاتريوتتىق شارا وتكىزىلۋدە. «بولمىس پەن بيىكتىك» دەگەن فورۋمنىڭ اتالۋىنىڭ ءوزى ۇلكەن ءمان بەرىپ وتىر.
بۇل شارانىڭ باستى ماقساتى – باتىر بابامىز باۋىرجان مومىشۇلىن ۇلگى رەتىندە كەڭىنەن ناسيحاتتاۋ، سونىمەن قاتار جاس بۋىننىڭ پاتريوتتىق سەزىمىن وياتۋ. كەلەشەك ۇرپاققا، جاستارعا، قازىرگى تاڭدا بارلىق قازاق ەلىنە بابامىزدىڭ ەرلىگى مەن باتىر رۋحىن ناسيحاتتاۋ. بۇگىنگى شاراعا تەك جاستار ەمەس، ستۋدەنتتەر ەمەس، بارلىق قۇقىق قورعاۋ ورگاندارى، اسكەريلەر دە قاتىسىپ وتىر. ولار وزدەرىنىڭ بالالارىن ەرتىپ كەلىپ وتىر. سونىمەن قاتار، فورۋمعا ءوڭىرىمىزدىڭ ەڭ اتاقتى، بەلگىلى باۋىرجاندارىنىڭ ءبارىن جيناعانبىز. ولار وبلىسىمىزدىڭ تۇكپىر-تۇكپىرىنەن، اۋداندارىمىزدان كەلىپ قاتىسىپ وتىر، - دەيدى “AMANAT” پارتياسى باتىس قازاقستان وبلىستىق فيليالى توراعاسى مۇرات مۇقاەۆ.
فورۋمدا وبلىس اكىمى اكىمى ناريمان تورەعاليەۆ قاتىسۋشىلاردى قۇتتىقتاپ، فورۋمعا ارنايى شاقىرىلعان، ءوز سالاسىندا جەتىستىكتەرگە جەتىپ جۇرگەن بىرقاتار باۋىرجان ەسىمدى قاتىسۋشىنى ماراپاتتادى. ولاردىڭ قاتارىندا كاسىپكەر دە، مۇعالىم دە، ۆەتەرينار دا، پوليتسيا دا، مادەنيەت سالاسىنىڭ قىزمەتكەرى دە، جۋرناليست تە، دارىگەر دە، ءىت-مامان دا، ءتىپتى رەسپۋبليكالىق وليمپيادا جەڭىمپازى بولعان مەكتەپ وقۋشىسى باۋىرجان بار.
شارادا پاتريوتتىق اندەر ورىندالىپ، حورەوگرافيالىق قويىلىمدار ۇسىنىلدى.
سونىمەن قاتار №37 مەكتەپتىڭ 100 وقۋشىسى باتىردىڭ رۋحىنا تازعىم ەتىپ، ء«بىز – ەرلىك پەن نامىستىڭ ۇرپاعىمىز! باۋىرجان مومىشۇلى – ءبىزدىڭ ماقتانىشىمىز، باتىرلىق – قانىمىزدا، تاۋەلسىزدىك – جانىمىزدا! ءبىز ەلگە ادال بولۋعا، اقيقاتتى ايتۋعا، حالقىمىزدى قۇرمەتتەۋگە، بولاشاعىمىز ءۇشىن ەڭبەك ەتۋگە – انت ەتەمىز!» – دەپ قولدارىن جۇرەك تۇسىنا قويىپ، ءبىر اۋىزدان سالتاناتتى تۇردە انت قابىلدادى.
