استانادا قازتاگ اقپارات اگەنتتىگىنىڭ باس رەداكتورى ءامىر قاسەنوۆ ۇستالدى، دەپ حابارلايدى "ادىرنا" ۇلتتىق پورتالى.
بۇل تۋرالى اگەنتتىكتىڭ ءوزى مالىمدەدى.
اگەنتتىكتىڭ باس ديرەكتورى اسەت ماتاەۆ Telegram-ارناسىندا قاسەنوۆتىڭ ساعات 19:00-دە ەسىل اۋداندىق پوليتسيا بولىمىنە شاقىرىلعاننان كەيىن ۇستالعانىن جازىپ، ارەكەتتى قۇقىق قورعاۋ ورگاندارى مەن Freedom Finance وكىلدەرىنىڭ زاڭسىز ىقپالى دەپ اتادى. ول قازاقستاندا ادىلدىك بولسا، بارلىق ايىپتار الىنىپ، قاسەنوۆ بوستاندىققا شىعۋى ءتيىس ەكەنىن اتاپ ءوتتى.
ادۆوكات رەنا كەريموۆانىڭ سوزىنشە، قاسەنوۆكە تاعىلعان ايىپ قىلمىستىق كودەكستىڭ 274-بابىنىڭ 3-بولىگى بويىنشا (ورتاشا اۋىرلىقتاعى قىلمىس) جانە بۇل باپ بويىنشا بەس جىلعا دەيىن باس بوستاندىعىنان ايىرۋ جازاسى قاراستىرىلعان. ادۆوكات ونىڭ ۇستالۋىن شامادان تىس قاتاڭ شارا دەپ باعالاپ، بۇل ارەكەتتىڭ قۇقىق قورعاۋ ورگاندارىنىڭ پسيحولوگيالىق قىسىم كورسەتۋ جانە زاڭسىز تەرگەۋ ادىستەرىن قولدانعانىنىڭ كورىنىسى دەپ سانايدى.
ەسكە سالا كەتەيىك، وتكەن اپتادا قازتاگ باسشىلارى استانادا Freedom Finance كومپانياسىنا قاتىستى ءباسپاسوز ءماسليحاتىن وتكىزگەن بولاتىن. سول جيىندا سالىمشىلار كومپانياعا قاتىستى شاعىمدارىن جەتكىزگەن.
