وڭتۇستىك كورەيا پروكۋراتۋراسى بۇرىنعى پرەزيدەنت يۋن سوك يولگە قاتىستى قوزعالعان قىلمىستىق ىستەردىڭ بىرىندە 10 جىلعا باس بوستاندىعىنان ايىرۋ جازاسىن سۇرادى. بۇل نەگىزگى ايىپ بويىنشا ەمەس، تەك ايىپتاردىڭ بىرىنە قاتىستى، دەپ حابارلايدى "ادىرنا".
ارنايى پروكۋراتۋرا وكىلدەرىنىڭ ايتۋىنشا، يۋن ءوز ارەكەتتەرىن جاسىرۋ جانە اقتاۋ ءۇشىن مەملەكەتتىك ينستيتۋتتاردى «جەكەشەلەندىرىپ»، «اۋىر قىلمىس» جاساعان.
«ايىپتالۋشىنىڭ قىلمىستىق ارەكەتتەرى كورەيا رەسپۋبليكاسىنداعى زاڭدىلىققا ەلەۋلى نۇقسان كەلتىرىپ، بيلىكتى سەنىپ تاپسىرعان ازاماتتارعا ۇلكەن زيان تيگىزدى»، - دەلىنگەن پروكۋراتۋرا مالىمدەمەسىندە.
سونداي-اق ەكس-پرەزيدەنت سوت پروتسەسى بارىسىندا وكىنىش نەمەسە كەشىرىم بىلدىرمەگەنى، كەرىسىنشە، اسكەري جاعداي ەنگىزۋ زاڭدى بولدى دەگەن ۇستانىمىن ساقتاعانى اتاپ وتىلەدى.
سۇرالعان ءجازا ادىل سوت تورەلىگىنە كەدەرگى كەلتىرۋ جانە سوعان بايلانىستى بىرقاتار ارەكەتتەر بويىنشا قويىلعان ايىپتارعا قاتىستى. ايىپتاۋ نۇسقاسىنا سايكەس، بۇل ارەكەتتەر 2024 جىلدىڭ جەلتوقسانىندا يۋن سوك ءيولدىڭ ەلدە اسكەري جاعداي ەنگىزۋگە جاساعان ارەكەتى اياسىندا ورىن العان.
پروكۋراتۋرا دەرەگىنشە، ەكس-پرەزيدەنت قاڭتار ايىندا تەرگەۋشىلەردىڭ ءوزىن ۇستاۋىنا كەدەرگى كەلتىرگەن. اسكەري جاعداي ەنگىزۋ جوسپارى قارالعان وتىرىسقا شاقىرىلماعان توعىز مينيستر كابينەتىنىڭ مۇشەسىنىڭ قۇقىقتارىن بۇزعان. اسكەري جاعداي جويىلعاننان كەيىن قايتا قارالعان پروكلاماتسيا ءماتىنىن جاساپ، كەيىن ونى جويعان.
سونىمەن قاتار يۋنعا رەجيم ەنگىزۋ تۋرالى جالعان اقپاراتتى باسپاسوزگە تاراتۋعا نۇسقاۋ بەرۋ، سول كەزەڭدەگى اسكەري قولباسشىلاردىڭ قورعالعان قىزمەتتىك تەلەفوندارىنداعى جازبالاردى ءوشىرۋ ايىپتارى تاعىلىپ وتىر.
ايىپتاۋشى تاراپ ەپيزودتار بويىنشا مىناداي جازالاردى سۇرادى:
-
5 جىل — ۇستاۋعا كەدەرگى كەلتىرگەنى ءۇشىن;
-
3 جىل — مينيسترلەردىڭ قۇقىقتارىن بۇزۋ، شەتەلدىك باسپاسوزدە جالعان اقپارات تاراتۋ جانە تەلەفون دەرەكتەرىن جويۋ ءۇشىن;
-
2 جىل — جاڭارتىلعان پروكلاماتسيا ءماتىنىن دايىنداعانى ءۇشىن.
قازىرگى ۋاقىتتا يۋن سوك يول اسكەري جاعداي ەنگىزۋگە تالپىنىسقا بايلانىستى تاعى ءۇش سوت ىسىنە قاتىسىپ جاتىر. ونىڭ ىشىندە نەگىزگىسى — بۇلىككە باسشىلىق ەتتى دەگەن ايىپ.
ءادىل سوت تورەلىگىنە كەدەرگى كەلتىرۋ ءىسى ءبىرىنشى بولىپ اياقتالادى: ۇكىم 16 قاڭتاردا، يۋننىڭ قاماۋ مەرزىمى اياقتالۋىنا ەكى كۇن قالعاندا جاريالانادى.
قورعاۋ تاراپى بۇلىك ءىسى بويىنشا شەشىمدى باسقا ءىس اياقتالعانشا كەيىنگە قالدىرۋدى سۇراعانىمەن، سوت بۇل ءوتىنىشتى قاناعاتتاندىرمادى. بۇلىككە قاتىستى ءىستى قاراۋ قاڭتاردىڭ باسىندا اياقتالىپ، ۇكىم اقپان ايىندا شىعۋى مۇمكىن.
ەسكە سالايىق، يۋن سوك يول 4 ساۋىردە ەلدە اسكەري جاعداي ەنگىزۋ ارەكەتىنىڭ ءساتسىز اياقتالۋىنا بايلانىستى قىزمەتىنەن شەتتەتىلگەن. سول كەزدە ەل تاريحىندا العاش رەت قىزمەتتەگى پرەزيدەنتكە قاتىستى قاماۋعا الۋ وردەرى بەرىلگەن ەدى.
