بەلارۋس پرەزيدەنتى الەكساندر لۋكاشەنكو مينسكىدە وتكەن اۋەسقوي حوككەي ماتچىندا مۇزعا قۇلاپ قالدى، دەپ حابارلايدى "ادىرنا".
لۋكاشەنكونىڭ كومانداسى مەن برەست وبلىسىنىڭ قۇراماسى اراسىنداعى كەزدەسۋ 5:5 ەسەبىمەن تەڭ اياقتالعان.
وقيعا ۆيدەوعا ءتۇسىپ قالعان. لۋكاشەنكو كومانداسىنىڭ 68-ءنومىرلى ويىنشىسى — ۇلتتىق قۇرامانىڭ بۇرىنعى حوككەيشىسى ياروسلاۆ چۋپريس ارتقا قاراي قوزعالىپ كەلە جاتىپ پرەزيدەنتكە سوعىلىپ كەتكەن. سونىڭ سالدارىنان الەكساندر لۋكاشەنكو مۇزعا قۇلاعان. چۋپريس بىردەن وعان كومەكتەسىپ، ورنىنان تۇرعىزعاننان كەيىن ويىن جالعاسىن تاپتى.
ماتچ مينسكىدەگى «وليمپيك-ارەنادا» ءوتتى. برەست وبلىسىنىڭ كومانداسى ساپىنان ۆيكتور ۆۋسيك، الەكساندر بۋرميسترونوك، سەرگەي پلوسكوۆ، الەكساندر كوروتكەۆيچ جانە نيكولاي ميرونچيك شايبا سوقتى. كەزدەسۋدىڭ ۇزدىك ويىنشىسى بولىپ قاقپاشى ۆاديم بويكو تانىلدى.
