يراندا سوڭعى ءۇش جىلداعى ەڭ اۋقىمدى بيلىككە قارسى جاپپاي نارازىلىق اكتسيالارى ەكى اپتادان بەرى جالعاسىپ كەلەدى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
ينتەرنەتتىڭ وشىرىلۋىنە جانە قاۋىپسىزدىك كۇشتەرىنىڭ قاتاڭ ارەكەتتەرىنە قاراماستان، سەنبىگە قاراعان ءتۇنى تۇرعىندار قايتادان تەگەران مەن وزگە دە قالالاردىڭ كوشەلەرىنە شىقتى.
Human Rights Activist News Agency قۇقىق قورعاۋ ۇيىمىنىڭ مالىمەتىنشە، نارازىلىقتار بارىسىندا شامامەن 50 شەرۋشى مەن 15 قاۋىپسىزدىك قىزمەتكەرى قازا تاپقان، ال 2311 ادام ۇستالعان. بۇل دەرەكتەردى Iran Human Rights ۇيىمى دا راستاپ وتىر. ۇيىم قازا تاپقانداردىڭ اراسىندا توعىز بالانىڭ بارىن حابارلادى.
BBC Persian قىزمەتى كەمىندە 22 ادامنىڭ قازا تاپقانىن ناقتىلاپ، ولاردىڭ وتباسىلارىمەن تىلدەسكەن.
مەديتسينا سالاسىنداعى جاعداي دا كۇردەلى. سپۋتنيكتىك Starlink ينتەرنەتى ارقىلى BBC-گە حابارلاسقان دارىگەردىڭ ايتۋىنشا، تەگەرانداعى نەگىزگى وفتالمولوگيالىق ورتالىق سانالاتىن فارابي اۋرۋحاناسى داعدارىس رەجيمىنە كوشكەن. جەدەل جاردەم قىزمەتتەرى شامادان تىس جۇكتەلىپ، بارلىق جوسپارلى وپەراتسيالار توقتاتىلعان. وسىنداي جاعداي يراننىڭ وڭتۇستىك-باتىسىنداعى شيراز قالاسىندا دا تىركەلگەن، وندا جارالانعاندار سانىنىڭ كوپتىگىنەن حيرۋرگتەر جەتىسپەي جاتىر.
نارازىلىق تولقىنى اياسىندا يراننىڭ سوڭعى شاحىنىڭ ۇلى رەزا پەحلەۆي شەرۋشىلەردى قالالاردىڭ ورتالىقتارىن باسىپ الىپ، ۇستاپ تۇرۋعا شاقىردى. اقش-تا جۇرگەن ساياساتكەر الەۋمەتتىك جەلىدەگى ۇندەۋىندە «ۇلتتىق رەۆوليۋتسيا جەڭىسكە جەتكەن كەزدە يرانعا ورالۋعا دايىن ەكەنىن» مالىمدەدى. كوپتەگەن شەرۋشىلەر ونىڭ ەسىمىن ۇران رەتىندە ايتىپ ءجۇر.
سونىمەن قاتار يران بيلىگى جاعدايدىڭ ۋشىعۋىنا اقش-تى ايىپتادى. يراننىڭ بۇۇ-داعى تۇراقتى وكىلى ۆاشينگتوندى ەلدىڭ ىشكى ىسىنە ارالاسىپ، تۇراقسىزدىق پەن زورلىق-زومبىلىقتى قوزدىرۋدا دەپ مالىمدەدى. ال اقش مەملەكەتتىك دەپارتامەنتى بۇل ايىپتاۋلاردى «شىندىقتان الشاق» دەپ اتادى.
