قازاقستاندا كونستيتۋتسيانىڭ 30 جىلدىعىنا وراي جاريالانعان راقىمشىلىق اياسىندا 2 مىڭنان استام ازامات قىلمىستىق-اتقارۋ جۇيەسى مەكەمەلەرىنەن بوساتىلدى. بۇل تۋرالى قر ىشكى ىستەر مينيسترلىگى قىلمىستىق-اتقارۋ جۇيەسى كوميتەتى (قاجك) مالىمدەدى، دەپ حابارلايدى "ادىرنا".
كوميتەتتىڭ حابارلاۋىنشا، راقىمشىلىق شارالارى اياسىندا سوتتار بارلىعى 15 970 ۇسىنىستى قاراعان.
«جۇرگىزىلگەن جۇمىستاردىڭ ناتيجەسىندە سوتتار 15 970 ۇسىنىستى قارادى. قىلمىستىق-اتقارۋ جۇيەسى مەكەمەلەرىنەن 2 مىڭنان استام ادام، ونىڭ ىشىندە ايەلدەر مەن كامەلەتكە تولماعاندار بوساتىلدى»، – دەلىنگەن رەسمي اقپاراتتا.
سونىمەن قاتار، راقىمشىلىققا ىلىككەندەردىڭ ءبىر بولىگىنە قاتىستى جازا مەرزىمى دە قىسقارتىلعان.
«سوتتار 11 مىڭنان استام سوتتالۋشىنىڭ جازا مەرزىمىن قىسقارتتى»، – دەپ ناقتىلادى قاجك.
كوميتەت وكىلدەرىنىڭ ايتۋىنشا، راقىمشىلىق الەۋمەتتىك تۇرعىدان وسال توپتاردى قامتىعان.
«راقىمشىلىق كامەلەتكە تولماعانداردى، بالالى ايەلدەردى، جۇكتى ايەلدەردى، مۇگەدەكتەردى جانە قارت ادامداردى قامتىدى. زاڭ پەنيتەنتسيارلىق جۇيەگە تۇسەتىن جۇكتەمەنى ازايتۋعا جانە الەۋمەتتىك ادىلەتتىلىكتى قولداۋعا مۇمكىندىك بەردى»، – دەپ اتاپ ءوتتى ۆەدومستۆو.
بوستاندىققا شىققان ازاماتتاردىڭ بارلىعى پروباتسيا قىزمەتىنىڭ تۇراقتى باقىلاۋىنا الىنعان. سونداي-اق ولار پوليتسيانىڭ جەكە ەسەبىنە قويىلىپ، قوعامعا بەيىمدەلۋ ۇدەرىسى قاداعالانادى.
