وليمپيادا چەمپيونى سەرىك ساپيەۆكە قاتىستى سوڭعى داۋلى جاعدايعا بايلانىستى تەكسەرىس جۇمىستارى باستالدى. بۇل تۋرالى قاراعاندى وبلىسى اكىمىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«وقيعانىڭ ءمان-جايىن جان-جاقتى ءارى ءادىل زەردەلەۋ ماقساتىندا سپورت باسقارماسىندا مەملەكەتتىك قىزمەت ىستەرى اگەنتتىگىنىڭ ءتيىستى دەپارتامەنتى تاراپىنان تەكسەرۋ باستالدى. سونىمەن قاتار باسقارمانىڭ قىزمەتىنە كەشەندى اۋديت جۇرگىزۋ كوزدەلىپ وتىر»،-دەلىنگەن حابارلامادا.
بۇعان دەيىن قاراعاندىدا دەنە شىنىقتىرۋ جانە سپورت باسقارماسىنىڭ باسشىسى سەرىك ساپيەۆ پەن ونىڭ ورىنباسارى داۋرەن ەسىمحانوۆ اراسىندا توبەلەس بولعانى تۋرالى اقپارات تاراعان ەدى. قازنەتتە جانجالدىڭ ۆيدەوسى تارادى. كەيىن ساپيەۆ بۇل وقيعاعا قاتىستى پىكىر ءبىلدىردى.
«ايماقتا جاسىرىن ىقپالى بار كەيبىر ادامدار تاراپىنان قارسىلىققا تاپ بولدىم. وبلىستىق سپورت ۇيىمدارىنىڭ باسشىلارىن زاڭسىز روتاتسيالاۋعا ارەكەت جاسالىپ، وعان مەنىڭ ورىنباسارىم دا قاتىسقان. مەن بۇل زاڭسىز ارەكەتتەردى توقتاتتىم، سونىڭ سالدارى وسى جاعدايعا اكەلدى»،-دەدى ول.
