اقتوبە وبلىسىندا ۇشقىشسىز ۇشۋ اپپاراتى قۇلادى. بۇل تۋرالى الەۋمەتتىك جەلى قولدانۋشىلارى جازدى، دەپ حابارلايدى "ادىرنا" ءتىلشىسى.
حابارلاماعا سايكەس، جەرگىلىكتى تۇرعىندار شامامەن ساعات 8:30 شاماسىندا قاتتى دىبىستى ەستىگەن. كەيىن رەسەيمەن شەكاراعا جاقىن ورنالاسقان الىمبەت اۋىلى ماڭىندا ءتۇتىن كوتەرىلگەن.
اقتوبە وبلىسى پوليتسيا دەپارتامەنتىنىڭ ءباسپاسوز قىزمەتى وقيعاعا قاتىستى تۇسىنىكتەمە بەردى.
«قارعالى اۋدانىندا ۇشقىشسىز ۇشۋ اپپاراتىنىڭ سىنىقتارىنا ۇقساس زاتتاردىڭ تابىلۋ دەرەگى بويىنشا تەكسەرۋ شارالارىن جۇرگىزۋدە. نىسان ەلدى مەكەن اۋماعىنان تىس جەردەن انىقتالدى. وقيعانىڭ بارلىق ءمان-جايى انىقتالىپ جاتىر»، – دەلىنگەن حابارلامادا.
بۇل ەلىمىزدە ۇشقىشسىز اپپاراتتاردىڭ قۇلاۋىنا قاتىستى العاشقى جاعداي ەمەس. 2025 جىلعى اقپاندا باتىس قازاقستان وبلىسى بوكەيوردا اۋدانىنىڭ ۇيالى اۋىلى اۋماعىنان بەلگىسىز ۇشۋ نىسانى تابىلعان. 2025 جىلعى 23 قازاندا باتىس قازاقستان وبلىسى ءبورلى اۋدانىندا ۇشقىشسىز ۇشۋ اپپاراتىنىڭ جارىلعانى تۋرالى حابارلانعان. ال 2026 جىلعى 26 ناۋرىزدا باتىس قازاقستان وبلىسىندا تاعى ءبىر ۇشقىشسىز اپپارات تابىلعانى ايتىلدى. قورعانىس مينيسترلىگى ءاربىر جاعداي بويىنشا تەكسەرۋ جۇرگىزىلەتىنىن مالىمدەگەن.
