ۇلىتاۋ وبلىسىندا جاس سپورتشىلار اراسىنداعى ۇستەل تەننيسىنەن قازاقستان رەسپۋبليكاسى چەمپيوناتى ءوز جالاۋىن كوتەردى.
اتالعان دودا وڭىردە تۇڭعىش رەت ۇيىمداستىرىلىپ وتىر. رەسپۋبليكالىق جارىسقا ەلىمىزدىڭ بارلىق وڭىرىنەن 2011 جىلى تۋعان جانە ودان كىشى جاستاعى 200-دەن استام جاس سپورتشى قاتىسۋدا.
چەمپيوناتقا بارلىعى 18 كوماندا جينالىپ، ءوزارا مىقتىنى انىقتايدى. ۇستەل تەننيسىنەن ەل بىرىنشىلىگى 27 قاڭتار مەن 1 اقپان ارالىعىندا وتەدى.
سپورتتىق شارانىڭ اشىلۋ سالتاناتىنا ۇلىتاۋ وبلىسى اكىمىنىڭ ورىنباسارى زينا اقىلبەكوۆا قاتىسىپ، جاس سپورتشىلارعا ساتتىلىك تىلەپ، جەڭىسكە دەگەن جىگەرلەرى مەن سپورتقا دەگەن قۇلشىنىستارى ارتا بەرۋىنە نيەت ءبىلدىردى.
ء«ىس-شارانىڭ ءدال ءبىزدىڭ وڭىردە ءوتۋى – ءبىز ءۇشىن ۇلكەن جەتىستىك. بىلتىر وبلىس ورتالىعىندا زاماناۋي سپورت كەشەنى پايدالانۋعا بەرىلدى. وسىنداي اۋقىمدى جارىستاردى جاڭا ينفراقۇرىلىمدا وتكىزۋ بولاشاق سپورتشىلاردىڭ شەبەرلىگىن شىڭداۋعا، سپورتتى دامىتۋعا سەرپىن بەرەدى. ۇستەل تەننيسىنەن ءوتىپ جاتقان بۇل چەمپيوناتتىڭ باستى ماقساتى – جاسوسپىرىمدەر اراسىندا بۇقارالىق سپورتتى دامىتۋ، دارىندى سپورتشىلاردى انىقتاۋ جانە ولاردىڭ كاسىبي دەڭگەيدە وسۋىنە جول اشۋ»، — دەدى ءوز سوزىندە ۇلىتاۋ وبلىسى دەنەشىنىقتىرۋ جانە سپورت باسقارماسىنىڭ باسشىسى مارات ايداشەۆ.
رەسپۋبليكالىق چەمپيونات جاس سپورتشىلار ءۇشىن تاجىريبە الماسۋ الاڭىنا اينالىپ، ەلىمىزدەگى ۇستەل تەننيسىنىڭ دامۋىنا تىڭ سەرپىن بەرەدى دەپ كۇتىلۋدە.
