Ūlytau oblysynda jas sportşylar arasyndaǧy üstel tennisınen Qazaqstan Respublikasy chempionaty öz jalauyn köterdı.
Atalǧan doda öŋırde tūŋǧyş ret ūiymdastyrylyp otyr. Respublikalyq jarysqa elımızdıŋ barlyq öŋırınen 2011 jyly tuǧan jäne odan kışı jastaǧy 200-den astam jas sportşy qatysuda.
Chempionatqa barlyǧy 18 komanda jinalyp, özara myqtyny anyqtaidy. Üstel tennisınen el bırınşılıgı 27 qaŋtar men 1 aqpan aralyǧynda ötedı.
Sporttyq şaranyŋ aşylu saltanatyna Ūlytau oblysy äkımınıŋ orynbasary Zina Aqylbekova qatysyp, jas sportşylarǧa sättılık tılep, jeŋıske degen jıgerlerı men sportqa degen qūlşynystary arta beruıne niet bıldırdı.
«Is-şaranyŋ däl bızdıŋ öŋırde ötuı – bız üşın ülken jetıstık. Byltyr oblys ortalyǧynda zamanaui sport keşenı paidalanuǧa berıldı. Osyndai auqymdy jarystardy jaŋa infraqūrylymda ötkızu bolaşaq sportşylardyŋ şeberlıgın şyŋdauǧa, sportty damytuǧa serpın beredı. Üstel tennisınen ötıp jatqan būl chempionattyŋ basty maqsaty – jasöspırımder arasynda būqaralyq sportty damytu, daryndy sportşylardy anyqtau jäne olardyŋ käsıbi deŋgeide ösuıne jol aşu», — dedı öz sözınde Ūlytau oblysy deneşynyqtyru jäne sport basqarmasynyŋ basşysy Marat Aidaşev.
Respublikalyq chempionat jas sportşylar üşın täjıribe almasu alaŋyna ainalyp, elımızdegı üstel tennisınıŋ damuyna tyŋ serpın beredı dep kütılude.
