دۋشانبەنىڭ حالىقارالىق اۋەجايى شەتەلدە قايتىس بولعان تاجىكستان ازاماتتارىنىڭ 1585 ءمايىتىن قابىلدادى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل كورسەتكىش 2024 جىلمەن سالىستىرعاندا 430-عا كوپ.
اۋەجاي قىزمەتكەرلەرى مايىتتەردىڭ ناقتى قاي ەلدەردەن جەتكىزىلگەنىن ايتقان جوق. الايدا باق بولجامىنشا، كوبىسى رەسەيدەن كەلگەن. سەبەبى وندا تاجىكستاننىڭ كوپ ميگرانتتارى تۇرادى. كوبىنەسە ءولىم جاعدايلارى قۇرىلىس الاڭدارىندا بولعان اپاتتار، جول-كولىك وقيعالارى، اۋرۋلار نەمەسە قىلمىستار سالدارىنان تىركەلەدى.
مىسالى، 11 قاڭتاردا رەسەيدە گازبەن ۋلانۋدان قايتىس بولعان ءۇش ادام تاجىكستانعا جەتكىزىلگەنى حابارلاندى. ولار كۋشونيون اۋدانىنىڭ شەدرۋد اۋىلىندا جەرلەندى. بۇدان بولەك، وتكەن جىلدىڭ جەلتوقسان ايىندا ماسكەۋ وبلىسىندا 10 جاستاعى كوبيلدجون اليەۆ قازا تاپقان وقيعا قوعامدا رەزونانس تۋدىرعان. قىلمىس وبەكتيۆتى جانە ءادىل تۇردە تەرگەلۋ ءۇشىن تاجىكستان بيلىگى رەسەيلىك قۇقىق قورعاۋ ورگاندارىنا ۇندەۋ جاساعان.
باق دەرەگىنشە، رەسپۋبليكاداعى باسقا حالىقارالىق اۋەجايلارعا قاتىستى ستاتيستيكا بەرىلمەگەن.
