الماتىداعى كرەماتسيا قىزمەتىنىڭ باستاپقى باعاسى 200 000 تەڭگەدەن باستالادى. الماتىداعى قىزمەت كورسەتۋشى ۇيىمداردىڭ مالىمەتىنشە، 200 مىڭ تەڭگەدەن باستالاتىن باعا تەك كرەماتسيا ءراسىمىن جۇرگىزۋدى عانا قامتيدى. ياعني بۇل سوماعا تاسىمالداۋ نەمەسە دايىندىق جۇمىستارى كىرمەيدى، دەپ حابارلايدى "ادىرنا".
كرەماتسيا قىزمەتىنىڭ تولىق قۇنى بىرنەشە جاعدايعا بايلانىستى قالىپتاسادى. نەگىزگى فاكتورلار مىنالار:
-
ەڭ جاقىن كرەماتوريگە دەيىنگى قاشىقتىق. ەگەر كرەماتوري قالا سىرتىندا نەمەسە باسقا وڭىردە ورنالاسسا، تاسىمالداۋ شىعىندارى ارتادى.
-
تاسىمالداۋ قىزمەتى. مارقۇمدى ارنايى كولىكپەن جەتكىزۋ دە جالپى باعاعا قوسىلادى.
-
تاسىمالداۋعا دايىندىق شىعىندارى. بۇعان دەنەنى راسىمگە دايىنداۋ، ونىڭ ىشىندە بالزامداۋ قىزمەتى كىرەدى.
-
قوسىمشا قۇرال-جابدىقتار. كرەماتسيا پروتسەسى مەن تاسىمالداۋ ءۇشىن ارنايى جابدىقتار مەن راسىمدىك اتريبۋتتار قاجەت بولۋى مۇمكىن.
مامانداردىڭ ايتۋىنشا، كرەماتسيانى تاڭداۋدىڭ بىرنەشە سەبەبى بار. ەڭ الدىمەن، ەكونوميكالىق تۇرعىدان تيىمدىلىگى ءجيى ايتىلادى. ءداستۇرلى جەرلەۋمەن سالىستىرعاندا، كرەماتسيا كەزىندە:
-
جەر تەلىمىن ساتىپ الۋدىڭ قاجەتى جوق;
-
ەسكەرتكىش نەمەسە قۇلپىتاس ورناتۋ شىعىندارى بولمايدى;
-
زيراتتى تۇراقتى كۇتۋدىڭ قاجەتتىلىگى ازايادى.
سونىمەن قاتار، كەيبىر ادامدار بۇل ءتاسىلدى پراكتيكالىق ءارى قاراپايىم ءراسىم رەتىندە قابىلدايدى.
ايتا كەتسەك، بۇعان دەيىن الماتى قالاسى قوعامدىق دەنساۋلىق ساقتاۋ باسقارماسى 2026جىلعى 9 قاڭتاردا قازاقستان رەسپۋبليكاسىنىڭ ادىلەت مينيسترلىگىندە ۇلتتىق ەكونوميكا مينيسترلىگىنىڭ تيپتىك جەرلەۋ ەرەجەلەرى مەن قابىردى كۇتۋ ءىسىن ۇيىمداستىرۋ تارتىبىنە وزگەرىستەر ەنگىزۋدى كوزدەيتىن بۇيرىعى تىركەلگەنىن حابارلاعان..
"جاڭا ەرەجەلەر كرەماتوريلەردىڭ قىزمەتىنە قۇقىقتىق نەگىز جاسايدى جانە قازاقستاندا كرەماتسيانى العاش رەت زاڭ دەڭگەيىندە جۇرگىزۋگە مۇمكىندىك بەرەدى", – دەلىنگەن الماتى قالاسى قوعامدىق دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاماسىندا.
بۇيرىق كۇشىنە ەنگەننەن كەيىن الماتىداعى كرەماتوري بارلىق سانيتارلىق جانە قۇقىقتىق تالاپتاردى ساقتاي وتىرىپ جۇمىسىن باستايدى.
