ۆەتنامدىق Green SM تاكسي سەرۆيسى قازاقستانداعى جۇمىسىنىڭ ەگجەي-تەگجەيىن جاريالاد، دەپ حابارلايدى "ادىرنا" ۇلتتىق پورتالى.
كومپانيانىڭ Forbes Kazakhstan باسىلىمىنا بەرگەن مالىمەتىنە سايكەس، قىزمەت كورسەتۋ الماتى قالاسىندا 2026 جىلدىڭ ماۋسىم ايىنىڭ سوڭىندا باستالادى.
Green SM قىزمەتىنىڭ وپەراتورى – Green And Smart Mobility Kazakhstan. كومپانيا وكىلدەرىنىڭ ايتۋىنشا، العاشقى كەزەڭدە جولاۋشىلاردى تاسىمالداۋعا ەلەكترلى VinFast VF 6 كولىكتەرى پايدالانىلادى. العاشقى ايلاردا ىسكە قوسىلاتىن اۆتوكولىكتەردىڭ ناقتى سانى ازىرگە جاريالانعان جوق.
قازىر كومپانيا الماتى قالاسىنداعى ىسكە قوسۋعا باسىمدىق بەرىپ وتىر. قازاقستاننىڭ وزگە وڭىرلەرىنە شىعۋ تۋرالى شەشىم كەيىنىرەك قابىلدانادى.
Green SM قىزمەتىنىڭ باستى ەرەكشەلىگى – تاكسي پاركى تولىقتاي ەلەكترلى كولىكتەردەن تۇرادى. كومپانيا بۇل شەشىمدى ءوزىنىڭ نەگىزگى باسەكەلەستىك ارتىقشىلىقتارىنىڭ ءبىرى دەپ سانايدى. سونىمەن قاتار جۇرگىزۋشىلەردى دايارلاۋ مەن قىزمەت كورسەتۋ ساپاسىنا ەرەكشە كوڭىل بولىنبەك. سەرۆيس كورپوراتيۆتىك كليەنتتەرمەن دە جۇمىس ىستەۋدى جوسپارلاپ وتىر.
Green SM-ءنىڭ قازاقستان نارىعىنا شىعۋ جوسپارى العاش رەت 2025 جىلدىڭ سوڭىندا بەلگىلى بولعان ەدى. ال 2026 جىلدىڭ كوكتەمىندە كومپانيا الماتىدا جۇرگىزۋشىلەر مەن قىزمەتكەرلەردى ىرىكتەۋدى باستاپ، ماۋسىم ايىنىڭ باسىندا جۇمىس شارتتارىن جاريالادى.
