بۇگىن استاناداعى ۆولونتەرلەر فورۋمىندا پرەزيدەنت قاسىم-جومارت توقاەۆ كونستيتۋتسيالىق رەفورمالار جونىندەگى كونستيتۋتسيالىق كوميسسيانىڭ بىرنەشە وتىرىسى جاڭا كونستيتۋتسيا قابىلداۋ كەرەك دەگەن بايلامعا كەلگەنىن ايتىپ، سوعان نازار اۋداردى، دەپ حابارلايدى "ادىرنا".
«مەن بىلتىرعى جولداۋىمدا الداعى ساياسي جاڭعىرۋدىڭ نەگىزگى باعىتتارى تۋرالى ۇسىنىستارىمدى ايتتىم. بۇل باستامالار قوعامنىڭ كەڭ قولداۋىنا يە بولدى، ونى بۇكىل ەل بولىپ تالقىلادىق. جارتى جىلدان بەرى كونستيتۋتسيالىق رەفورماعا قاتىستى قىزۋ پىكىرتالاس ءجۇرىپ جاتىر. پارتيالاردان، دەپۋتاتتار مەن ساراپشىلاردان، زاڭگەرلەر مەن قوعام بەلسەندىلەرىنەن مىڭداعان ۇسىنىس كەلىپ ءتۇستى. وندا مەملەكەتتىڭ ينستيتۋتسيونالدىق نەگىزدەرىن وزگەرتۋدەن باستاپ، اتا زاڭنىڭ ءماتىنىن رەداكتسيالاۋعا دەيىن، وتە كوپ ماسەلە قامتىلدى»، - دەدى توقاەۆ.
قاسىم-جومارت توقاەۆ كونستيتۋتسيالىق كوميسسيا وتىرىستارىندا اتا زاڭىمىزعا قاتىستى كوپتەگەن پروگرەسسيۆتى، يننوۆاتسيالىق ۇسىنىستار بەرىلگەنىنە نازار اۋداردى
«حالىقتان كەلىپ تۇسكەن ۇسىنىستاردى جۇيەلەپ، جيناقتاۋ ءۇشىن كونستيتۋتسيالىق كوميسسيا قۇرىلدى. كوميسسيا جۇمىسى ەلىمىزدىڭ قوعامدىق-ساياسي ومىرىنە تىڭ سەرپىن بەردى. كوميسسيا مۇشەلەرى كونستيتۋتسيالىق رەفورماعا قاتىستى ءار ماسەلەنى ەگجەي-تەگجەيلى قاراپ، جان-جاقتى تالقىلاپ، اۋقىمدى جۇمىس اتقارىپ جاتىر. وسىعان دەيىن كوميسسيانىڭ 5 وتىرىسى ءوتتى. ونىڭ ءبارى الەۋمەتتىك جەلىدە تىكەلەي ەفيردەن كورسەتىلىپ، اقپارات قۇرالدارى ارقىلى كەڭىنەن تاراتىلدى»، - دەدى پرەزيدەنت.
