قازاقستان ەۋرازيالىق ەكونوميكالىق وداققا توراعالىق ەتىپ وتىر، دەپ حابارلايدى "ادىرنا" ۇلتتىق پورتالى.
ماسكەۋدە وتكەن ەۋرازيالىق ەكونوميكالىق كوميسسيا كەڭەسىنىڭ بيىلعى العاشقى وتىرىسىن قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين اشتى.
بۇل تۋرالى ۇكىمەتتىڭ ءباسپاسوز قىزمەتى حابارلادى.
سەرىك جۇمانعارين كەڭەس مۇشەلەرى مەن بايقاۋشى ەلدەردىڭ وكىلدەرىنە قازاقستان توراعالىعىنىڭ نەگىزگى باسىم باعىتتارىن تانىستىردى. ونىڭ ايتۋىنشا، مەملەكەت باسشىسى قاسىم-جومارت توقاەۆ ەاەو ەلدەرى باسشىلارىنا جولداعان ۇندەۋىندە ورتاق جۇمىستىڭ باسىم باعىتتارىن ايقىنداعان.
اتاپ ايتقاندا، 2026 جىلى ەكونوميكانىڭ ءتۇرلى سالالارىنا جاساندى ينتەللەكت قۇرالدارىن ەنگىزۋ، وداقتىڭ لوگيستيكالىق الەۋەتىن ءتيىمدى پايدالانۋ، ونەركاسىپ پەن اگروونەركاسىپ كەشەنىن تسيفرلاندىرۋ، ءوزارا ساۋداداعى كەدەرگىلەردى جويۋ، سونداي-اق ءۇشىنشى ەلدەرمەن ساۋدا-ەكونوميكالىق ىنتىماقتاستىقتى دامىتۋعا ەرەكشە نازار اۋدارۋ ۇسىنىلادى.
سونىمەن قاتار، ورتاق پروتسەستەردى تولىق كولەمدە جۇزەگە اسىرۋدىڭ ماڭىزدىلىعى اتاپ ءوتىلدى. قازىرگى تاڭدا بەكىتىلگەن 77 ورتاق پروتسەستىڭ تەك 42-ءسى عانا ءىس جۇزىندە ىسكە اسىرىلعان. ۋاكىلەتتى ورگانداردىڭ اقپاراتتىق جۇيەلەرىنىڭ ءوزارا ينتەگراتسيالانباۋى وداق اياسىندا تاۋارلاردىڭ ەركىن قوزعالىسىن قامتاماسىز ەتۋگە كەدەرگى كەلتىرىپ وتىر.
قازاقستان توراعالىعىنىڭ باسىم باعىتتارىنىڭ ءبىرى رەتىندە «كەدەرگىسىز» ءترانزيتتى دامىتۋ ماسەلەسى دە اتالدى. بۇل ناۆيگاتسيالىق پلومبالاردى كەڭىنەن قولدانۋدى، بىرىڭعاي ترانزيتتىك دەكلاراتسيانى ەنگىزۋدى جانە كەدەندىك باجداردى تولەۋدىڭ بىرىزدەندىرىلگەن تەتىكتەرىن پايدالانۋدى كوزدەيدى. اتالعان شارالار تاسىمال جىلدامدىعى مەن شىعىندارىن ازايتۋعا مۇمكىندىك بەرەدى.
سونداي-اق كووپەراتسيالىق جوبالاردى دامىتۋعا ايرىقشا كوڭىل بولىنبەك. قازىرگى تاڭدا قازاقستان، قىرعىزستان، بەلارۋس جانە رەسەي كومپانيالارىنىڭ قاتىسۋىمەن بەس كووپەراتسيالىق جوبا ماقۇلدانعان. الداعى ماقسات — كووپەراتسيا قورجىنىن كەڭەيتۋ، بىرلەسكەن وندىرىستەر سانىن ارتتىرۋ، جاڭا جۇمىس ورىندارىن اشۋ جانە ءوندىرىستى لوكاليزاتسيالاۋ دەڭگەيىن جوعارىلاتۋ.
وتكىزۋ نارىقتارىن كەڭەيتۋ ماقساتىندا ءۇشىنشى ەلدەرمەن ساۋدا كەلىسىمدەرىن كەزەڭ-كەزەڭىمەن ىلگەرىلەتۋ ۇسىنىلدى. بۇل كەلىسىمدەر ەاەو-عا مۇشە مەملەكەتتەردىڭ بيزنەسى ءۇشىن تۇراقتى ەكونوميكالىق ءوسۋدىڭ نەگىزگى كوزدەرىنىڭ ءبىرى رەتىندە قاراستىرىلادى.
