الماتى وبلىسىندا ەكى جارىم جىل بۇرىن ءىز-ءتۇسسىز جوعالىپ كەتكەن 28 جاستاعى ەر ادام ءولى تابىلدى، دەپ حابارلايدى "ادىرنا" ۇلتتىق پورتالى.
بۇل اقپاراتتى Lider.kz ەرىكتىلەر قوزعالىسى Instagram جەلىسىندەگى پاراقشاسىندا جاريالاعان.
مالىمەتكە سايكەس، حابيدۋللا جالعاس حابيدۋللاۇلى 2023 جىلعى 4 ماۋسىم كۇنى جوعالعان. سول كۇنى تاڭعى ساعات 09:00 شاماسىندا ول جامبىل اۋدانى قارعالى اۋىلىنداعى ۇشقوڭىر كوشەسىندە ورنالاسقان ۇيىنەن شىعىپ كەتكەن.
ىزدەۋ بارىسىندا ەر ادامنىڭ بەلگىلەرى جاريالانعان. ونىڭ دەنە ءبىتىمى ورتاشا، كوزى قوڭىر، شاشى قىسقا ءارى قارا بولعان. جوعالعان كەزدە ۇستىندە دجينسى كۇرتەشە، سۇر ءتۇستى فۋتبولكا، كوك دجينسى شالبار جانە قويۋ كوك ءتۇستى كروسسوۆكا بولعان.
ەرىكتىلەردىڭ مالىمەتىنشە، ەر ادامنىڭ دەنەسى 2025 جىلعى 23 جەلتوقساندا تابىلعان. قازىرگى ۋاقىتتا وقيعانىڭ باسقا ءمان-جايلارى ناقتىلانىپ جاتىر.
قۇزىرلى ورگاندار بۇل جاعداي بويىنشا تەكسەرۋ جۇرگىزۋى مۇمكىن.
