شىعىس قازاقستان وبلىسىندا 6 اي بۇرىن جوعالىپ كەتكەن ايەلدىڭ دەنەسى تابىلدى. بۇل تۋرالى شقو پوليتسيا دەپارتامەنتى ءباسپاسوز قىزمەتى مالىمدەدى، دەپ حابارلايدى “ادىرنا” ءتىلشىسى.
مالىمەتكە سۇيەنسەك، 47 جاستاعى ايەل 2022 جىلدىڭ تامىز ايىنىڭ ورتاسىندا كەشكى ۋاقىتتا جۇمىستان شىعىپ، سول كۇيى حابار-وشارسىز كەتكەن.
حابار تۇسكەن سوڭ ءتارتىپ ساقشىلارى مەن ەرىكتىلەر ايەلدى ىزدەۋگە جۇمىلدىرىلدى.
الايدا ونى تابۋ مۇمكىن بولمادى. ايەل ادام ۇلان اۋدانى بوزانباي اۋىلىندا تۇرعان.
"2023 جىلدىڭ قاڭتارىندا جوعالعان ايەلدىڭ دەنەسى تابىلدى. قازىرگى ۋاقىتتا قر قىلمىستىق كودەكسىنىڭ 99-بابىمەن (ادام ءولتىرۋ) سوتقا دەيىنگى تەرگەۋ امالدارى باستالدى", - دەلىنگەن اقپاراتتا.
ۆەدومستۆو وكىلدەرى ۇلان اۋدانى تۇرعىنىنىڭ دەنەسى قايدان تابىلعانى، قانداي جاراقاتتان كوز جۇمعانى تۋرالى مالىمەت بەرمەدى.
"باسقا اقپارات بەرۋگە زاڭ شەڭبەرىندە تىيىم سالىنعان. سەبەبى بۇل پروتسەسكە قاتىسۋشىلاردىڭ قۇقىقتارى مەن زاڭدى مۇددەلەرىنىڭ بۇزىلۋىنا اكەلىپ سوعادى", - دەلىنگەن حابارلامادا.
