جاڭا سپورت ورتالىعىنىڭ قۇرىلىسى بيىلعى جىلدىڭ سوڭىنا دەيىن اياقتالادى دەپ جوسپارلانىپ وتىر.
جاقىندا شىعىس قازاقستان وبلىسىنىڭ اكىمى نۇرىمبەت ساقتاعانوۆ ۆولەيبول ورتالىعىنىڭ قۇرىلىسى باستالعان اۋماققا بارىپ، جۇمىس بارىسىمەن تانىستى. ەكى قاباتتى كەشەندە ەكى سپورت زالى قاراستىرىلعان — ءبىرى جارىستار وتكىزۋگە، ەكىنشىسى وقۋ-جاتتىعۋ پروتسەسىنە ارنالعان. نەگىزگى زال شامامەن 200 كورەرمەنگە ەسەپتەلەدى. سونداي-اق عيماراتتا كيىم اۋىستىراتىن بولمەلەر، دۋش جانە سانيتارلىق توراپتار جابدىقتالادى.
جوبانىڭ باس مەردىگەرى — «DK PROEKT» كومپانياسى.
«وڭىردە ۆولەيبول قارقىندى دامىپ كەلەدى، سوندىقتان ءبىز بۇل سپورت تۇرىمەن اينالىساتىنداردى جان-جاقتى قولداۋىمىز قاجەت، — دەپ اتاپ ءوتتى نۇرىمبەت ساقتاعانوۆ.
— Berel ۆولەيبول كلۋبى جاقسى ناتيجەلەر كورسەتىپ ءجۇر جانە ءوز سپورتتىق بازاسىنا لايىق. كوماندا الداعى ۋاقىتتا دا حالىقارالىق جارىستاردا تابىستى ونەر كورسەتىپ، جانكۇيەرلەرىن قۋانتا بەرەدى دەپ سەنەمىن».
ورتالىق 10 جاستان اسقان بالالارعا، جاسوسپىرىمدەرگە جانە ەرەسەكتەرگە ارنالعان. سپورت زالدارىندا ءبىر ۋاقىتتا 84 ادامعا دەيىن جاتتىعا الادى: نەگىزگى ۆولەيبول زالىندا — 24 سپورتشى، وقۋ-جاتتىعۋ زالىندا — 36, ال ترەناجەر زالىندا تاعى 24 ادام. كۇنى بويى ارقايسىسى ەكى ساعاتتان تۇراتىن التى جاتتىعۋ اۋىسىمىن وتكىزۋ جوسپارلانعان.
ۆولەيبول ورتالىعىنىڭ سالىنۋى ءوڭىردىڭ سپورتتىق ينفراقۇرىلىمىن ايتارلىقتاي نىعايتىپ، سپورتشىلاردى دايارلاۋعا جانە جارىستار وتكىزۋگە زاماناۋي جاعداي جاساۋعا مۇمكىندىك بەرەدى. سونداي-اق بالالار مەن جاستاردى سپورتپەن تۇراقتى تۇردە اينالىسۋعا كەڭىنەن تارتۋعا ىقپال ەتەدى.
