استانادا «تازا قازاقستان» اكتسياسى اياسىندا تىلدەردى دامىتۋ جانە ارحيۆ ءىسى باسقارماسىنا قاراستى «رۋحانيات» ورتالىعىندا ء«تىل تازالىعى – وي تازالىعى» تاقىرىبىندا اشىق ساباق ءوتتى، دەپ حابارلايدى ەلوردا اكىمدىگىنىڭ رەسمي سايتى.
ءىس-شارانىڭ نەگىزگى ماقساتى – انا ءتىلىنىڭ تازالىعىن ساقتاۋ، ساۋاتتى سويلەۋ مادەنيەتىن قالىپتاستىرۋ جانە قوعامدا مەملەكەتتىك تىلگە دەگەن جاۋاپكەرشىلىكتى ارتتىرۋ. اشىق ساباقتى رۋحانيات ورتالىعىنىڭ وقىتۋشىسى ايجان قۇدايبەرگەنقىزى جۇرگىزدى.
ءىس-شارا بارىسىندا رۋحانيات ورتالىعىنىڭ باسشىسى ارمان شەريزات ءسوز سويلەپ، مەملەكەت باسشىسى ۇسىنعان «تازا قازاقستان» تۇجىرىمداماسىنىڭ مازمۇنىنا كەڭىنەن توقتالدى.
«مەملەكەت باسشىسىنىڭ «تازا قازاقستان» جوباسىن ودان ءارى جانداندىرۋ ماقساتىندا ءاربىر ورتالىق، ءاربىر مەكەمە بۇل يدەيانى ءوز باعىتىنا ساي جۇزەگە اسىرۋى ءتيىس. ءبىز «تازا قازاقستان» ۇعىمىن تەك سىرتقى تازالىقپەن شەكتەمەيمىز. بۇل – ەڭ الدىمەن ادامنىڭ وزىنەن، ءوز وتباسىنان، ءوز تىلىنەن باستالاتىن رۋحاني تازالىق. سوندىقتان تازا قازاق تىلىندە سويلەۋ، ءتىل مادەنيەتىن ساقتاۋ – وسى باستامانىڭ ماڭىزدى بولىگى. بۇگىنگى اشىق ساباق تا «تازا قازاقستان» اكتسياسى اياسىندا، مەملەكەتتىك ءتىلدىڭ تازالىعىن ناسيحاتتاۋ ماقساتىندا وتكىزىلىپ وتىر»، – دەدى ول.
ايتا كەتەيىك، رۋحانيات وقۋ ورتالىعى 2018 جىلدان بەرى قازاق ءتىلىن ۇيرەتۋ باعىتىندا جۇيەلى جۇمىس جۇرگىزىپ كەلەدى. وسى ۋاقىت ارالىعىندا جىل سايىن تەگىن كۋرستار ۇيىمداستىرىلىپ، ورتا ەسەپپەن 1500 ادام قازاق تىلىنەن ءبىلىم العان. ال وتكەن جىلدان باستاپ بۇل كورسەتكىش ارتتىرىلىپ، جىلىنا 3000 ادامعا دەيىن وقىتۋ جولعا قويىلعان.
«قازاق ءتىلىن ۇيرەنۋگە قىزىعۋشىلىعىم جوعارى. قازىر ءبىرشاما مەڭگەرىپ قالدىم. وسى ورتالىقتا ءبىلىم الىپ ءجۇرىپ كوپتەگەن پايدالى دۇنيەلەردى ۇيرەندىم. الداعى ۋاقىتتا قازاق ءتىلىمدى بارىنشا جەتىلدىرىپ، ەركىن سويلەيتىن دەڭگەيگە جەتسەم دەيمىن»، – دەيدى قالا تۇرعىنى اناستاسيا گادزەنكو.
